जय बागेश्वरी देगः पुनःनिर्माण सम्झौता खारेज

येँ – विश्व सम्पदाया धलखय् दुथ्यानाच्वंगु पशुपतिया ग्वलय् च्वंगु जयबागेश्वरी देगः पुनःनिर्माणया सम्झौता खारेज याःगु दु । उगु देगः पुनःनिर्माणया निंतिं दातालिसे जूगु सम्झौता पशुपति विकास कोषं खारेज याःगु खः ।देगः पुनःनिर्माणया निंतिं जूगु सम्झौता खारेजया प्रक्रियाय् वने धुंकूगु व उकिया प्राधिकरणयात जानकारी बीगु ज्या नं जुइ धुंकूगु कोषं न्ह्यथंगु दु । २०७२ साल बैशाख १२ गतेया तःभुखाचं क्षति जूगु देगः पुनःनिर्माणया निंतिं एड्भेन्चर टुर एण्ड ट्राभल्सया संचालक कल्याण शर्मायात सैद्धान्तिक स्वीकृति बिउगु खः ।कोषया आः नकतिनि च्वंगु कार्यसम्पादन बैठकं भुखाय् ब्वःगु स्वदँ दयेत्यंकाः आतक नं पुनःनिर्माणया निंतिं सम्झौता याःगु दातां क्षतिग्रस्त जयबागेश्वरी देगः पुनःनिर्माण याये मफयेवं उगु सम्झौता हे खारेज याना बिउगु खः ।

कोषया कोषाध्यक्ष डा. मिलनकुमार थापां उगु बैठकं दातां बीगु धाःगु ग्वाहालि नं मकायेगु निर्णय याःगु व स्थानीयवासीतय्सं थःपिंसं नं पुनःनिर्माण याये दयेमा धकाः इनाप याःगुलिं आः उगु देगः पुनःनिर्माणया जिम्मा सुयात नं मबिसे राष्ट्रिय पुनःनिर्माण प्राधिकरणया ग्वाहालिं कोष थम्हं हे यायेगु धयादीगु दु । थ्व हे झ्वलय् देगः पुनःनिर्माणया जिम्मेवारी कयादीम्ह दाता शर्मां आः वयाः देगः दयेके मफइगु धासें सम्झौता रद्द यायेमाल धकाः निवेदन बिउगु खँ सीदुगु दु । दाता शर्मां देगः दने मफइगु खःसां देगःया दनेत न्यय्गू लाख तका दां धाःसा कोषयात बीगु निवेदनय् धयाःगु दु ।