चोभाःया जग्गाय् जनताया दावी

नेपालभाषा टाइम्स

येँ – चोभारय् दयेकाच्वंगु सुख्खा बन्दरगाहया जग्गा थःपिंत तुं लित बीमाःगु दावी सहित म्हिगः स्थानीय जनतां निवेदन दर्ता याःगु दु । सुख्खा बन्दरगाह प्रभावित जनतां म्हिगः अन बन्दरगाह दयेकाच्वंगु संस्था नेपाल इन्टरमोडेल यातायात विकास समितिया साइट अफिसय् वनाः थ्व जग्गा थःपिंत लित बीमाःगु दावी सहित उगु निवेदन दर्ता याःगु खः ।

चोभार संरक्षण समितिया नायः पञ्चलाल महर्जनया नेतृत्वय् वंगु पुचलं उगु निवेदन बिउगु खः । थ्व स्वयां न्ह्यः विकास समितिं बन्दरगाह दयेकेगु सम्बन्धी स्थानीय जनतां पेश याःगु गुनासो आधारहीन खः धासें तत्कालीन हिमाल सिमेन्ट कम्पनीया कर्मचारीतय् तलब भत्ता व जग्गा मुआब्जालिसे सम्बन्धित गुनासो पुष्टि यायेगु आधार व प्रमाण मदुगु दावी याःगु खः ।

अथे खःसां नं प्रमाण दुसा प्रमाण सहित वैशाख १६ गते दुने संयन्त्रया ज्याकुथी निवेदन बिउ वा धकाः समितिं इनाप याःगु खःसा उकियात हे लिसः बी कथं प्रभावित स्थानीय जनतां प्रमाण दुगु दावी सहित जग्गा लित बीमाःगु माग यासें निवेदन बिउगु खः ।

प्रभावित स्थानीय वासिन्दां वि.सं. २०३० पुस १ गते सरकारं छगू प्रयोजनया निंतिं जग्गा अधिग्रहण याःगु तर उगु प्रयोजन क्वचायेधुंकाः थःपिंत जग्गा लित बीमाःगु माग याःगु खः । उगु मागयात कयाः अदालतं नं माःगु आदेश बीधुंकाः सरकारं जबर्जस्ती २०७४ असोज २७ गते हिमाल सिमेन्टया नामय् दुगु जग्गा सरकारीकरण याःगु द्वपं पीडिततय्सं बिउगु दु । थःपिंसं जग्गा लित बीमाःगु प्रमाण सहित निवेदन बियागु खँ अध्यक्ष पञ्चलाल महर्जनं कनादीगु दु ।

थःपिंसं प्रमाणया रुपय् पुनरावेदन व सर्वोच्च अदालतया फैसला प्रतिलिपि, मालपोत कार्यालयया पौ, जिल्ला प्रशासन कार्यालय जग्गा लित बीगु सम्बन्धी निर्णय, जग्गा प्राप्ति ऐनया दफा ३४ या सम्बन्धय् सर्वोच्च अदालतया नजिर, गृह मन्त्रालयया पौ लगायतया प्रमाण पेश याःगु खः ।

चोभाः लागायात पर्यटकीय क्षेत्र दयेकेमाः धकाः संरक्षण समितिं थीथी योजना दयेकाः ज्या न्ह्याकाच्वंगु इलय् सरकारं अन सुख्खा बन्दरगाह दयेकेगु धकाः प्रधानमन्त्री केपी शर्मा ओलीं शिलान्यास समेत यायेधुंकूगु दु । स्थानीय जनताया विरोधया दथुइ अन शिलान्यास यायेगु ज्या जूगु खः । शिलान्यास यायेगु निंतिं अन द्वःछि स्वयां अप्वः सुरक्षाकर्मी परिचालन याःगु खः ।

चोभाःया जग्गाय् जनताया दावीउगु थासय् सुख्खा बन्दरगाह दयेकल धाःसा उकिं यानाः चोभाः जक मखु मुक्कं स्वनिगःया हे वातावरण प्रदुषित जुइगु चेतावनी वातावरणविद्तय्सं बियाच्वंगु दु ।