थौं २५६८ क्वःगु स्वांयाः पुन्हि

येँ (नेपालभाषा टाइम्स)- थौं २५६८ क्वःगु स्वांयाः पुन्हि थीथी ज्याझ्वः यासें देय्न्यंकं हनाच्वंगु दु । भगवान बुद्ध बूगु, बुद्धत्व प्राप्त याःगु व महापरिनिर्वाण जूगु न्हि बैशाख पुन्हि कुन्हु विश्वन्यंकं दँय्दसं स्वांयाः पुन्हि हनी ।

थुगुसी स्वांया पुन्हिया लसताय् लुम्बिनीइ जुइगु विशेष ज्याझ्वलय् प्रधानमन्त्री पुष्पकमल दाहाल मूपाहाँ कथं झायादी । अथेहे येँय् बुद्धजयन्ती समारोह समितिया ग्वसालय् आनन्दकुटी विहारय् थीथी ज्याझ्वः जुइत्यंगु दु । समितिया महासचिव गौतमरत्न शाक्यया कथं सुथय् श्रीलंकाया राजदूतपाखें अस्थि धातु पिकयाः सर्वसाधारणयात दर्शनया निंतिं तयेगु ज्या जुइ, थ्व धुंकाः बुद्ध पुजा, ज्ञानमाला भजन, हिदान ज्याझ्वःया लिसें बौद्ध सभा जुइसा बहनी दीप प्रज्वलन याइ ।

बागमती प्रदेशया संस्कृति, पर्यटन तथा सहकारी मन्त्री शैलेन्द्रमान वज्राचार्य मू पाहाँ कथं झाइगु ज्याझ्वलय् समितिपाखें आनन्दकुटी विहारया प्रमुख व समितिया सल्लाहकार भिक्षु मैत्री महास्थविर व अनागारिका विञ्ञवती गुरुमांयात हनेज्या व गुज्यरत्न शाक्ययात कदरपत्र बीगु ज्याझ्वः नं तयातःगु दु ।

स्वांयाः पुन्हिया लसताय् संयुक्त राष्ट्र संघ अन्तर्गतया युएनडीपीया नेपाःस्थित ज्याकुथिइ नं सभा जुइगु ज्याझ्वः दु ।