जगतसुन्दर ब्वनेकुथिया २९ क्वःगु बुन्हि हना ज्याझ्वः

येँ – नेपालभाषाया प्यंगःथांमध्ये छगः मास्टर जगतसुन्दर मल्लया नामं नीस्वनातःगु नेपालभाषाया माध्यमं आखः ब्वंकीगु नेपाःया हे न्हापांगु ब्वनेकुथि जगतसुन्दर ब्वनेकुथिया २९ क्वःगु बुन्हि म्हिगः छगूया ज्याझ्वःया दथुइ हन ।प्रदेश नं. ३ या सांसद राजेश शाक्य मूपाहांकथं झायादीगु उगु ज्याझ्वलय् नेवाः देय् दबूया नायः नरेश ताम्राकार, नेपालभाषा केन्द्रीय विभागया प्रमुख डा. ओमकारेश्वर श्रेष्ठ विशेष पाहांकथं झायादीगु खः ।

ब्वनेकुथि संचालक समितिया नायः लक्ष्मीदास मानन्धरया सभापतित्वय् जूगु ज्याझ्वलय् ब्वनेकुथियात थीथीकथं ग्वाहालि यानादीपिं व दातापिंत नं हनेगु ज्या जूगु खः । नापं नेपालभाषा विषय कयाः दकलय् अप्वः ल्याःहःपिं ब्वनेकुथिया विद्यार्थीपिंत व थीथी तगिंमय् ब्वनीपिं विद्यार्थीपिंत छात्रवृत्ति बीगु निंतिं अक्षकोषया नं घोषणा याःगु खः ।

ब्वनेकुथिया पुलांम्ह भाइस प्रिन्सिपल मदुम्ह शान्ति मानन्धरया नामं ‘शान्ति सिरपाः’ व छात्रवृत्तिया निंतिं वय्कःया दाजु ज्ञानेन्द्र मानन्धरं व ‘विरन्चि–मोतिमाया सिरपाः’या निंतिं गुह्येश्वरीराज, बुद्धशरण, धर्मशरण व अनिलरत्न मानन्धरपाखें अक्षयकोषया घोषणा यानादीगु खः ।

उगु हे ज्याझ्वलय् मदुम्ह अम्बिका मानन्धरया नामय् नीस्वनातःगु छात्रवृत्तिया दाता सरिता मानन्धर नापं थुगु दँय् नेपालभाषा विषया कयाः दकलय् अप्वः ल्याःहःपिं सुजित श्रेष्ठ व रमन महर्जन नापं दकलय् उत्कृष्ट शिक्षिकाकथं रमिता मालाकारयात विशेष हनेज्या नं जूगु खः ।ज्याझ्वलय् ब्वनेकुथिया प्रिन्सिपल सुनिता मानन्धरं लसकुस यानादीगु खःसा ब्वनेकुथिया संचालक समितिया दुजः डा. चुन्दा वज्राचार्यं सुभाय् देछानादीगु खः ।