स्वनिगलय् हाकनं लकडाउन यायेगु बारे सहलह

येँ (नेपालभाषा टाइम्स) – कोभिड १९ संकट व्यवस्थापन केन्द् (सिसिएमसी) निर्देशक समितिया संयोजक व उपप्रधानमन्त्री ईश्वर पोखरेल व काठमाडौं उपत्यका नगरपालिका फोरमया पदाधिकारी दथुइ बुधवाः स्वनिगलय् कोरोना नियन्त्रण सम्बन्धी ताःहाकःगु सहलह जूगु दु ।

फोरमया सचिव व मध्यपुर थिमि नगरपालिकाया मेयर मदन सुन्दर श्रेष्ठया कथं न्याघौ ताःहाकःगु सहलहय् स्वनिगलय् अप्वया वनाच्वंगु कोरोना संक्रमणयात गुकथं पनेगु धयागु विषयय् खँल्हाबल्हा जूगु खः । वय्कलं स्वन्ति व छठ नखः धुंकाः कोरोना संक्रमण पनेगु निंतिं प्रभावकारी पलाः ल्ह्वने बारे सहलह जूगु खँ धयादीगु दु ।

‘आः हे निर्णय ला मजूनि, तर कोरोना पनेगु निंतिं व निगूगु लहर मवयेकेगुनिंतिं कडा लकडाउन यानाः परीक्षणया दायरा तब्याः यायेगु धयागु विषयय् सहलह जूगु दु’ वय्कलं कनादीगु दु । थुकिया निंतिं संघ, प्रदेश व स्थानीय तह दथुइ गुकथं समन्वय याना वनेगु धयागु बारे खँ जूगु नं वय्कलं कनादीगु दु । बैठकय् उपप्रधानमन्त्री पोखरेल, गृहमन्त्री रामबहादुर थापा, स्वास्थ्यमन्त्री भानुभक्त ढकालपिंसं स्वनिगःया मेयरपिंत समन्वय यानाःन्ह्याःवनेत इनाप यानादीगु खः ।

थौंकन्हय् न्हियान्हिथं देय्न्यंकं कोरोना पुष्टि संक्रमण जुइपिं मध्ये ५३ प्रतिशत स्वनिगलयापिं हेलानाच्वंगु दु। अथे जूगुलिं स्वनिगलय् संक्रमण पनेगु निंतिं प्रभावकारी पलाः ल्ह्वने हथाय् जुइधुंकूगु धासें थ्व सहलह जूगु खः । सहलहय् आपूर्ति व्यवस्था सहज यायेगु, कोरोनाया निगूगु लहर मवयेकेगु निंतिं प्रभावकारी कुतः यायेग, समुदाय परिचालन यायेगु, स्वनिगलय् कोरोना प्रभाव म्होयायेत स्वनिगलय् दुहां वइगु नाकाय् हेल्थ डेस्क तयेगु आदि विषयया खँ नं जूगु खः । अथेहे स्थानीय तहपाखें प्रभावकारी रुपं जनचेतनामूलक ज्या यायेगु, स्थानीय तहयात छेँय् छेँय् परिचालिन यानाः थ्व विषयय् सहलह यायेगु बारे नं बैठकय् सहलह जूगु खँ धाःगु दु ।