पूर्ण रुपं संक्रमण मुक्त मजुइकं छेँय् लित मछ्वयेत सर्वोच्च्या आदेश

येँ (नेपालभाषा टाइम्स) – सर्वोच्च अदालतं लक्षण खनेमदुपिं कोरोना भाइरस संक्रमितपिंत पीसीआर परीक्षण मयासे छेँय् छ्वयेगु सरकारी निर्देशिका कार्यान्वयन मयायेत आदेश बिउगु दु। सर्वोच्च अदालतं पूर्ण रुपं संक्रमण मुक्त जूगु सुनिश्चितत लिपा जक बिरामीयात अस्पतालं डिस्चार्ज यायेत सरकारया नामय् अन्तरिम आदेश बिउगु खः ।

अधिवक्ता सन्तोष भण्डारीं दायर याःगु रिटय् सुनुवाई यासें न्यायाधीशपिं आनन्द मोहन भट्टराई व टंकबहादुर मोक्तानया इजलाशं पूर्ण रुपं ल्वय् लंगु सुनिश्चितता यानाः जक बिरामीयात छेँय् छ्वयेत आदेश बिउगु खः ।

स्वास्थ्य उपचारयात संविधानं मौलिक हक अन्तर्गत तयातःगुलिं सरकारं थः नागरिकया पूर्ण रुपय् वासः यायेगु दायित्वं बिसिउँ वनेमजिउगु आदेशय् न्ह्यथनातःगु दु ।

वंगु जेठ २० गते सरकारं वासः याकाच्वंपिं कोरोना संक्रमितयात लक्षण खनेमदुगु आधारय् डिस्चार्ज यायेगु व उमिगु पीसीआर परीक्षण यायेम्वाःगु निर्देशिका जारी याःगु खः ।

सर्वोच्चं उगु निर्देशिकाया दफा ६ सं न्ह्यथनातःगु लक्षण मदुपिं विरामीया पीसीआर परीक्षण मयासें छेँय् छ्वयेगु निर्देशन आःयात कार्यान्वयन मयासें पीसीआर परीक्षण लिपा ल्वचं मुक्त जूगु सुनिश्चितता जुइधुंकाः जक छेँय् छ्वयेत आदेश बिउगु खः ।