जयबागेश्वरी देगः पुलांगु हे प्रविधिं पुनर्निर्माण जुइगु

येँ (नेपालभाषा टाइम्स) – नेवाः सभ्यताया उद्गमस्थलकथं कयातःगु येँ देय्या पुलांगु बस्ती ग्वलय् च्वंगु जयबागेश्वरी देगः पुलांगु हे प्रविधिकथं चां दनीगु जूगु दु। २०७२ बैशाख १२ गतेया विनाशकारी तःभुखातं क्षतिग्रस्त देगः दनेत गठन यानातःगु समितिं बिउगु सुझावकथं चाः जक प्रयोग यानाः देगः दनेत्यंगु खः ।

देगः दनेगु निंतिं पुरातत्वविद्, संस्कृतिविद् लगायतया विज्ञतय् समिति गठन यानाः देगः निर्माण यायेगु सम्बन्धय् सुझाव माग याःगु खः । न्यादँ न्ह्यः भुखाचं क्षति जूगु देगः पुनःनिर्माणया निंतिं थुंगु इलय् थौंकन्हय् पिनें खने दुगु देगःया संरचना दुने हाकनं मेगु देगः लुया वःगु खः । जयबागेश्वरी देगः दनेत थुंगु इलय् उगु देगः दुने भैरव देगःलिसें स्वंगः गजू दुगु देगः व देगःया अंगलय् थीथी देवी देवताया चित्रत च्वयातःगु लुया वःगु खः । देगः दुने मेगु देगःनापं महत्वपूर्ण सामग्री लुया वयेवं छगू समिति गठन याःगु खःसा आः व हे समिति बिउगु सुझावकथं हे देगः दनेत चाः जक प्रयोग यायेगु खँ पशुपति क्षेत्र विकास कोषं न्ह्यथंगु दु ।

कोषया कार्यकारी निर्देशक डा. घनश्याम खतिवडायाकथं पुरातत्व, संस्कृतिविद् व विज्ञसहितया समिति गठन यानाः देगः निर्माणया निंतिं सुझाव माग यायेगु ज्या जूगु खः । समितिं देगः पुनःनिर्माणय् चा प्रयोग यायेत बिउगु सिफारिससहितया प्रतिवेदन बिउगु वय्कलं कनादिल । प्रतिवेदनया हे लिधंसाय् कोषं चां दनातःगु देगः पुनःनिर्माणया निंतिं अध्ययन नं याःगु खः ।

विज्ञ समितिया दुजःलिसें पुरातत्व विभागया पुलांम्ह महानिर्देशक दामोदर गौतमं ऐतिहासिक व पुरातात्विक महत्वं जाःगु देगः पुनःनिर्माण यायेबलय् न्हापा प्रयोग जुयाच्वंगु हे ज्वलं प्रयोग यानाः दयेकेमाःगु प्रावधान दुगुलिं व हे कथं थःपिंसं नं सुझाव बियागु खँ कनादिल ।

विश्व सम्पदाया धलखय्दु थ्यानाच्वंगु थाय् जूगुलिं प्राचीन स्मारक संरक्षण ऐनकथं पुनःनिर्माण यायेमाःगु जुइ । देगः पुनःनिर्माणय् स्वंगू करोड १४ गू लाख लागतय् पुनःनिर्माण जुइ ।

सम्बन्धित बुखँ

LEAVE YOUR COMMENTS