ने. सं. ११४६ बछलागा चौथी -

देय्न्यंकं ख्वाउँ अप्वल

येँ (नेपालभाषा टाइम्स)स्वनिगःलिसें देय्न्यंकं ख्वाउँ अप्वया वंगु दु । स्वनिगःया तापक्रमय् म्होति वःगुयालिसें ख्वाउँ अप्वया वंगु महसुस यानाहःगु दु । मोहनि धुनेवं हे ख्वाउँ अप्वया वंगु मौसम पूर्वानुमान महाशाखां न्ह्यथंगु दु । महाशाखाया कथं वंगु शुक्रवाः स्वनिगःया तापक्रम न्युनतम १० डिग्री सेल्सियस मापन याःगु दुसा शनिवाः १० दशमलव २ डिग्री न्यूनतम तापक्रम मापन याःगु खः । थुगुसी स्वनिगलय् चिकुला शुरु जूगु इलंनिसें आतकया दकलय् म्हो तापक्रम मापन याःगु दु ।

न्हिनसिया इलय् निभाः दन्न त्वयाः तांन्वःसां सुथय् व बहनिसिया इलय् धाःसा मौसम तसकं ख्वाउँसे च्वंगु महाशाखां न्ह्यथंगु दु । उखे नेपाःया हिमाली जिल्ला जुम्लाय् दकलय् म्हो तापक्रम मापन याःगु दु । जुम्लाय् म्हिगः शनिवाः आतकया दकलय् म्हो २ डिग्री सेल्सियस तापक्रम मापन याःगु दु ।