बाँसबारीइ पर्यावरण उद्यान निर्माण याइगु

येँ- येँ महानगरपालिका वडा नं. ३ बाँसबारीस्थित महापुरपाखाय् पर्यावरण उद्यान (इको पार्क) निर्माण याइगु जूगु दु । २०५५ सालय् नक्सा पास यानाः गुरुयोजना तकं तयार याना तयेधुंकूगु व लिपा अलपत्रय् लाःगु उगु थासय् २२ दँ लिपा वयाः उकथं पार्क निर्माण यायेत्यंगु खः ।
येँ महानगरपालिका वडा नं. ३, भुइजःसि नगरपालिका वडा नं. ७ व तोखा नगरपालिका वडा नं. ४ या लागाय् दयेकेत्यंगु उगु पार्कया निर्माण लागत २ गू करोड ५० गू लाख खः ।

येँ महानगरपालिकाया प्रमुख विद्यासुन्दर शाक्यं इको पार्क निर्माणया निंतिं शिलान्यास यानादीगु खः । उगु इलय् महानगर प्रमुख शाक्यं थ्व इलय् जनप्रतिनिधिं परीक्षा बियाच्वंगु व उकिया मूल्यांकन यायेगु भाला महानगरवासी जूगु धासें वय्कलं पार्क निर्माणय् बजेटया अभाव जुइके प्रतिवद्धता प्वंकादिसें इलय् पार्क निर्माणया ज्या सम्पन्न यायेत इनाप यानादिल ।

वय्कलं धयादिल, ‘जनप्रतिनिधिं थ्व इलय् परीक्षा बियाच्वंगु दु । महानगरवासीं नं १०० लय् २०, ३०, ६०, ८०, ९० गुलि फु उलि बियादिसँ, थ्व छिकपिनिगु हे जिम्माय् जुल ।’

३ वडाअध्यक्ष दीपक केसीं उगु पार्क निर्माण अन्र्तगत न्हापांगु चरणय् उत्तरपाखे सामाखुसि खुसि सिमानापाखें दक्षिणपाखे बछि ज्या क्वचायेकेगु लक्ष्य दुगु जानकारी बियादिल । अथे हे निगूगु चरणय् ज्या क्वचायेकेत येँ मनपां १ गू करोड ५० गू लाख बजेट विनियोजन याःगु नं वय्कलं कनादिल ।

न्हापांगु चरणया ज्या थ्व हे वंगु मंसिर व निगूगु चरणया ज्या चालु आर्थिक दँ दुने हे सिधयेकेगु लक्ष्य दुगु नं वय्कलं धयादिल ।
येँ महानगरपालिका सहरी योजना आयोगं पार्कया डिजाइन तयार याःगु खःसा पार्क निर्माणय् वातावरण संरक्षण व पर्यावरणयात बिशेष ध्यान बियागु खँ धाःगु दु ।

सम्बन्धित बुखँ

LEAVE YOUR COMMENTS