अमेजन जंगलया मि बारे विश्वया चिउताः

येँ – ब्राजिलया विशाल अमेजन जंगलय् मिं नःगुलिं विश्व समुदायया ध्यानाकर्षण जूगु दु। पृथ्वीया आपालं जीवजन्तु व वनस्पतिया भन्डारया रुपय् कयातःगु अमेजन जंगलय् मिं नयेवं विश्वया छगू धरोहर हे नष्ट जुइगु अनुमान याःगु दु ।

विश्वया प्रकृतिप्रेमीं अमेजन जंगलया मिं नियन्त्रण यायेत ब्राजिल सरकारं वेवास्ता याःगु धासें ब्राजिललिसेया व्यापार पनेमाःगु सः थ्वयेकूगु दु। ब्राजिलया विरोधय् सः थ्वयेवं ब्राजिलया राष्ट्रपति जेयर बोल्सोनाराें जंगलया मिं नियन्त्रण यायेत सेना परिचालन यायेगु आदेश बिउगु दु ।

ब्राजिलया उत्तरपश्चिमी रोन्डोनिया राज्यया ख्वातूगु जंगलय् निरन्तर रुपं कुँत्याः पिहां वयाच्वंगु दु। छम्ह एएफपीया फोटोग्राफरया कथं सलंसः किलोमिटरं निसें हे मिं ब्वाला खने दयाच्वंगु दु। उम्ह फोटो ग्राफरया कथं उगु दृश्य सामान्य खनेमदु ।

जंगलन्यंकं हे मिं नयाच्वंगु व सर्गतय् कुँ जुयाच्वंगु खँ राज्यया राजधानी पोर्टाे भेल्होया छम्ह होटलया कर्मचारीं कंगु दु। नगर लिकसं च्वंगु जंगलय् मिं नयाच्वंगुलिं नगर पूरा हे कुं जायाच्वंगु दु ।

विश्वया हे तःधंगु जंगलया रुपय् कयातःगु थुगु जंगलय् मिं नयेवं विश्वन्यंकं चिन्ता प्वंकाच्वंगु दु। तथ्यांक कथं थुगु दँय् ब्राजिलय् ७६,७२० गू वन मिं नःगु घटना जूगु दुसा वंगु बुधवाः व बिहीवाः निन्हुया दुने जक ७०० गू मिं नःगु घटना जूगु दु। थ्व मध्ये दकलय् अप्वः अमेजन जंगलय् मिं नःगु दु।

अमेजन जंगलयात विश्वया दकलय् अप्वः अक्सिजन उत्पादन याइगु जंगल कथं कयातःगु दु। थुकियात विश्वया स्वँ नं धाइ । थुगु जंगलं जलवायु हिपाउाःयात न्यूनीकरण यायेत तःधंगु भूमिका म्हिताच्वंगु दु। अमेजन जंगलया मि स्यायेत सरकार असफल जूगु धासें ब्राजिलियन जनतां रियो डे जेनेरियो व साओ पाउलोय् न्हिथं प्रदर्शन यानाच्वंगु दु ।

सम्बन्धित बुखँ

LEAVE YOUR COMMENTS