सिटी, रियल, लिभरपुल व आयाक्स त्यात, पिएसजी बराबरीइ

एजेन्सी÷ च्याम्पियन्स लिग अन्तर्गत बुधवाः चान्हय् जूगु कासाय् म्यानचेस्टर सिटीं जर्मन क्लब आरबी लाइपजिगयात ६–३ गोेलं बुकूगु दु । कासाय् सिटीया निंतिं रियाद महारेज, नाथक एके, ज्याक ग्रिलिस, जाओ कान्सेलो व ग्राबीएल जेससं छगू छगू गोल याःगु खः । मेगु छगू गोल नोर्दी मुकिएलेलं आत्मघाती याःगु खः । लाइपजिगया निंति क्रिस्टोफर एनकुन्कुं ह्याट्रिक याःगु खः । मेगु कासाय् डच क्लब आयाक्सं पोर्चुगलया क्लब स्पोर्टिङ सिपीयात ५–१ गोलं बुकल । आयाक्सया निंतिं हालरं प्यंगू गोल व स्टेभेनं छगू गोल याःगु खः । पाउलिन्हों स्पोर्टिङया निंतिं छगू गोल यात । अथे हे स्पेनिस क्लब रियल म्याड्रिडं इटालियन क्लब इन्टर मिलानयात १–० गोलं बुकूगु खः । रियलया निंतिं कासाया छगू जक गोल रोड्रिगाें याःगु खः ।
ईंग्लिस क्लब लिभरपुलं इटालीया एसी मिलानयात ३–२ गोलं बुकल । लिभरपुलया निंतिं सलाह व जोर्डनं छगू छगू गोल याःगु खःसा छगू गोल मिलानं आत्मघाती याःगु खः । मिलानया टोमोरीं आत्मघाती गोल याःगु खः । एसी मिलानया निंतिं रेबिक व ब्राहिम डियाजं छगू छगू गोल याःगु खः । सलाहं थ्व कासाय् गोल यानाः स्टेभन जेरार्डया कीर्तिमानया बराबरी याःगु खः । सलाहं घरेलु मैदान एनफिल्डय् दकलय् अप्वः गोल याःम्ह युरोपियन कासामि जेरार्डं तयातःगु कीर्तिमानया बराबरी नं याःगु खः । अथे हे जर्मन क्लब डर्टमण्डं बेसिकटासयात २–१ गोलं व सेरिफं साख्तरयात २–० गोलं बुकल ।
मेसी, एमबाप्पे व नेयमार थेंज्याःपिं उत्कृष्ट कासामि ज्वनाः मैदानय् वंगु पिएसजी धाःसा च्याम्पियन्स लिगय् बराबरीइ म्हितल । फ्रेन्च क्लब पिएसजीं बेल्जियन क्लब ब्रुग्सं छगू छगू गोलया बराबरीया कासा म्हितूगु खः । कासाय् पिएसजीं एन्डर हेरेराया गोलं अग्रता काःगु खःसा ब्रुग्सया निंतिं हान्स भानाकेनं बराबरी गोल याःगु खः । लिगय् एथ्लेटिको म्याड्रिडं पोर्टोलिसें गोलरहित बराबरी म्हितल ।

सम्बन्धित बुखँ

LEAVE YOUR COMMENTS