जेठं चालीगु जुल तातोपानी नाका

येँ – २०७२ साल वैशाख १२ गते ब्वःगु तःभुखाय् लिपा बन्द जुयाच्वंगु तातोपानी नाका वइगु जेठ १७ गते निसें सञ्चालनय् वइगु जूगु दु । भुखाय् लिपा बन्द जुयाच्वंगु नाका हाकनं सञ्चालनय् हयेगु निंतिं पुनर्निर्माण यायेगु ज्या जुयाच्वंगु दु । प्रधानमन्त्री केपी शर्मा ओलीया निर्देशनय् मन्त्री, प्रधानमन्त्री कार्यालयया सल्लाहकारपिं, पुनर्निर्माण प्राधिकरणया प्रमुख, सांसदया पुचलं मंगलवार तातोपानी नाकाय् वनाः निरीक्षण याःगु खः ।

नाकाया स्थलगत निरीक्षणया निंतिं परराष्ट्र मन्त्री प्रदीप ज्ञवाली, भौतिक योजना तथा पूर्वाधार मन्त्री रघुवीर महासेठ, पुलांम्ह मन्त्री अग्नि सापकोटा, प्रधानमन्त्रीया प्रमुख राजनीतिक सल्लाहकार विष्णु रिमाल, परराष्ट्र सल्लाहाकार राजन भट्टराई, पुनर्निमाण प्राधिकरणया प्रमुख कार्यकारी अधिकृत सुशील ज्ञवाली घनश्याम भट्टराईपिंनिगु पुचलं निरीक्षण याःगु खः ।

उच्चस्तरीय पुचलं अन दयेकाच्वंगु सुख्खा बन्दरगाह, मितेरी पुल, सतकया निरीक्षण याःगु खः । छुं समस्या दुगु थासय् तत्काल ज्या क्वचायेकेत मन्त्रीतय्सं सम्बन्धित सचिवयात निर्देशन बिउगु दु । तातोपानी नाका चायेकेगु निंतिं चाइनां थःगु थासय् चांन्हिं ज्या यानाच्वंगु दुसा नेपाःपाखें धाःसा गुलि ज्या जुइमाःगु खः । उलि ज्या मजुयाच्वंगु खँ सीदुगु दु ।

नेपाःया निरीक्षण यायेत वंगु पुचःयात चिनियां पुचलं जेठ १७ गते नाका सञ्चालन यायेगु जानकारी बिसें आः गुबलें नं नाका बन्द मजुइ कथं थःपिंसं ज्या यानाच्वनागु जानकारी बिउगु खः ।

सम्बन्धित बुखँ

LEAVE YOUR COMMENTS