थनिंनिसें मस्तय्त खोपया निगूगु डोज बीगु

येँ – येँ महानगरपालिकां थनिनिसें वइगु फागुन ५ गते तक कोरोना विरुद्धया फाइजर खोपया निगूगु डोज बीगु जूगु दु । जिल्ला खोप समन्वय समिति येँया वंगु माघ २० गतेया निर्णय कथं येँमनपां फाइजरया निगूगु मात्रा खोप बीगु सुचं जारी याःगु दु ।

येँँमनपाया स्वास्थ्य विभाग प्रमुख बलराम त्रिपाठीं म्हिगः छगू सुचं जारी यासें येँमनपाया ३२ गुलिं वडाय् खोप समन्वय समितिया निर्णय कथं विद्यालयय् खोप केन्द्र दयेकाः ज्याझ्वः न्ह्याकेत धाःगु दु । सुचं कथं खोप काइपिं लक्षित पुचः १२ निसे १७ दँ तकया न्हापांगु खोप काःगु नीछन्हु पूवनेधुंकूपिंसं न्हापा खोप काःगु कार्डया आधारय् निगूगु डोज कायेदइ ।

खोप बीगु ज्या न्ह्याकेगु झ्वलय् स्वास्थ्य मापदण्ड पूर्ण रुपं पालना यायेत नं येँमनपां इनाप याःगु दु । कोरोना संक्रमण स्वंगूगु लहर न्ह्यानाच्वंगु इलय् सरकारं खोप बीगु ज्याझ्वःयात तीव्रता बियाच्वंगु दु ।