मोहनीबलय् छेँय् वनीपिं म्हो, बस टिकट याउँक

येँ (रासस) – सरकारं न्हापा न्हापा थें मोहनी, स्वन्ति नखःया निंतिं छेँय् लिहां वनीपिनिगु निंतिं बसया अग्रिम टिकट बुकिङ मयाःसां थुगुसी यात्रुतय्सं धाःसा याउँक टिकट कायेखनाच्वंगु दु। यात्रुतय् हे म्हो जूगुलिं याउँक टिकट कायेखंगु खः ।

मोहनिया इलय् न्हापा स्वयां तसकं म्हो जक यात्रुतय्सं स्वनिगः त्वःता वंगुलिं समस्या मजूगु खँ यातायात व्यवस्था विभागं धाःगु दु । बजारया मागया आधारय् हे अग्रिम टिकट मचायेकाःगु खँ विभागया प्रवक्ता डा. लोकनाथ भुषालं धयादीगु दु । न्हापा स्वयां प्यब्वय् छब्व जक मनूत मोहनिया निंतिं छेँय् वंगुलिं आः दुगु सवारीसाधन हे कुगाक्क दुगु खँ वय्कलं धयादीगु दु। वय्कलं थप आवश्यक जूसा थप सवारीसाधनया व्यवस्था यायेफइगु खँ नं धयादीगु दु । वय्कलं धयादीगु दु, ‘जिमिसं नियमित रुपं यातायात व्यवसायीतलिसे खँ ल्हानाच्वनागु दु ।’

न्हापा न्हापा थ्यंमथ्यं २० लाखम्ह मनूत मोहनिया निंतिं स्वनिगः त्वःता वनीगु जुयाच्वंगु खःसा थुगुसी थ्यंमथ्यं प्यंगू न्यागू लाख जक छेँय् वनीगु अनुमान याःगु दु । न्हापा न्हापा तसकं हुलमुल जुइगुलिं थुगुसी बसपार्कय् नं भीडभाड खनेमदु । छुं न्हि न्ह्यव जक सरकारं सार्वजनिक सवारी साधनय् सिट कथं जक यात्रु तयेदइगु व तोके यानातःगु स्वयां अप्वः भाडा कायेमदइगु व्यवस्था याःगु खः ।