छवाःयंकं विश्व रक्तदाता दिवस हनीगु

येँ- नेपाल ब्लड डोनर्स एशोसियसन (ब्लोदानं) छवाःयंकं थीथी ज्याझ्वः यासें विश्व रक्तदाता दिवस हनीगु जूगु दु । ब्लोदानं आः नकतिनि छगू पत्रकार सम्मेलन यासें उकिया जानकारी बिउगु खः ।

ब्लोदानया महासचिव ई. सानुबाबु प्रजापतिं पत्रकार सम्मेलनय् स्वयमसेवी हिदानय् ब्लोदान व ब्लोदानया भूमिका विषयय् छगू ज्यापौ नं न्ह्यब्वयादीगु खः । वय्कलं मनूत हि विना म्वाये मफइगु व उपचारया झ्वलय् हिया आवश्यक जुइपिं मनूतय्त मनूया हे हि बाहेकं मेपिं सुनानं बचे याये फइगुलिं हिदानया महत्व आपालं दु धयादिल ।
ब्लोदानं हिदान याइपिं संस्थायात निरन्तरता बीत पहल यायेगु, सरोकारवाला दक्वं निकायया सहभागिताय् इलय्व्यलय्

अन्तक्र्रिया व समन्वय यायेगु, हिदान सम्बन्धी उत्प्रेरणा बीमाःगु, शल्यक्रिया याइगु अस्पतालतय्सं नं हिदानया निंतिं विशेष पहल यायेमाःगु थौंया आवश्यक जूगु वय्कलं धयादिल ।
पत्रकार सम्मेलनय् ब्लोदानया केन्द्रीय कार्यवाहक अध्यक्ष रमेशध्वज बस्नेतं विना शोधभर्ना हि उपलब्ध याकेत थःपिं सफल जूसां नं लिपांगु इलय् हिदान याइपिनिगु ल्याः म्हो जूगु व हिया माग धाःसा अप्वःगुलिं यानाः उकिया पूरा याये मफयाच्वंगु धयादिल ।

रिपोर्टस क्लबया अध्यक्ष ऋषि धमलां आवंलिं थम्हं नं स्वलाय् छकः हिदान यायेगु घोषणा यासें हरेक वालय् रिपोर्टस क्लबय् हिदान सम्बन्धी ज्याझ्वःत तया वनेगु प्रतिवद्धता नं प्वंकादिल ।
ब्लोदानया कोषाध्यक्ष मचकाजी महर्जनं विश्व रक्तदाता दिवसया लसताय् संस्थापाखें जुइगु छवाःयंकंया थीथी ज्याझ्वःया बारे जानकारी बियादीगु खः ।

ब्लोदानया संस्थापक दुजः अर्जुनप्रसाद श्रेष्ठं थम्हं आतक १६३ क्वः हिदान यायेधुंगु तर थःत अज्याःगु छुं नं कमजोरीया अनुभव मजूगु धासें थौंकन्हय् न्हिं ४५० प्वाइन्ट हिया माग जुयाच्वंगु तर हि संकलन धाःसा १०० प्वाइन्ट जक जुयाच्वंगुलिं शोधभर्नाया विकल्प मदु धयादिल ।