लानिपुखूया उलेज्या वइगु ५ गते

येँ (नेपालभाषा टाइम्स) – लानि पुखूया उलेज्या थ्वहे वइगु कार्तिक ५ गते जुइगु जूगु दु। राष्ट्रपति विद्यादेवी भण्डारी पुनर्निर्माण जूगु पुखूया उलेज्या यानादीगु खँ पुनर्निर्माण प्राधिकरणया इन्जिनियर राजु मानन्धरं ‘नेपालभाषा टाइम्स’ यात कनादीगु दु ।

उलेज्याया झ्वलय् देय्न्यंकं थीथी ५१ गू पवित्र तीर्थस्थलं निलः हयाः तयेगु ज्या जुइगु खँ नं वय्कलं कनादीगु दु। वय्कःया कथं येँया १७, यलया निगू व ख्वपया प्यंगू तीर्थस्थलया लः तयेगु जुइसा मेमेगु पवित्र तीर्थस्थलया लः हयेगु निंतिं आह्वान यायेधुनागु खँ नं कनादीगु दु ।

उलेज्याया झ्वलय् क्षमा पुजा यायेगु, बालगोपालेश्वर देगलय् दुपिं द्यःया न्यासः (प्राण प्रतिष्ठा) यायेगु ज्या जुइगु जानकारी नं वय्कलं बियादीगु दु। थौं कन्हय् पुखू सफा यायेगु लिसे मत तयेगु ज्या नं पिलांगु चरणय् थ्वनाच्वंगु खँ नं वय्कलं कनादीगु दु ।

२०७२ सालया वैशाख १२ ब्वःगु तःभुखाचं क्षति जूगु पुखू दयेकेगु निंतिं २०७२ साल माघ २ गते राष्ट्रपति विद्यादेवी भण्डारीं शिलान्यास यानादीगु खः । आः दयेकेगु ज्या क्वचाःगु लानिपुखूया बालगोपालेश्वर देगःया प्रताप मल्लकालीन ग्रन्थकुट शैली (शिखर शैलीं) पुनर्निर्माण याःगु खः । थ्व स्वयां न्ह्यः उगु देगः राणाकालीन इलय् बुर्जा शैली पुनर्निर्माण याःगु खः । पुखूया उलेज्या लिपा थुगुसी स्वन्तिया किजापुजा कुन्हु देगः चाइगु जूगु दु। जुजु प्रताप मल्लं यम्ह काय चक्रवर्तेन्द्र मदयेवं दुःख तायेकाच्वंम्ह लानियात सान्त्वना बीगु वि.सं १७२७ उगु पुखू दयेकूगु खः ।