होशियार !

टेलिभिजन, पत्रिकाय् खंगु छगू लु लुमना वइ । नेतृ रामकुमारी झाँक्रीं नेता माधवकुमार नेपालयात ल्हाः ज्वनाः निर्वाचन आयोगय् यंकाच्वंगु । न्हूगु पार्टी दर्ता यायेत । रामकुमारी । वाक कलाय् निपुणम्ह नेतृ । केपीया कट्टर विरोधी । रामकुमारी झाँक्रीं माधवयात ल्हाः ज्वनाः यंकाच्वंगु दृश्य खनाः फेसबुकय् टिकाटिप्पणी वइ । नेतातय्त तुति सालाः क्वफाइपिं जक दइ धाःगु धापू असत्य खः ।

स्वयादिसँ ! नेतृ रामकुमारीं माधव नेपालया ल्हाः ज्वनाः यंकाच्वंगु चित्र । नेतातय्त लिधंसा बियाः यंकाच्वंपिं कार्यकर्तात नं दइ धइगु तथ्यया प्रमाण । ख नं खः । नेतृ झाँक्री माधवया कट्टर समर्थक । प्रचण्डया अनुयायी । वं प्रचण्डया इलय् व्यलय् मुक्तकण्ठं प्रशंसा याना जुइ ।
तर ।अमेरिकाया सहयोग कार्यक्रम एमसीसीं देय्या राजनीति ख्यलय् तःधंगु भुखाय् ब्वयेकाबिल । प्रधानमन्त्री देउवाया नेतृत्वय् गठन जूगु गठबन्धन सरकार एमसीसी प्रकरणं हःगु भुखाचं गल्र्यामगुर्लुम जुयाः दुना वनीगु खः ला ? प्यखेरं आशंका लुयाच्वंगु दु ।

खतुं गठबन्धनया सरकारयात तासया छेँ खंकीपिं यक्व दु । गुगुं निश्चित समान राजनीतिक सहमति व सैद्धान्तिक समानताया जग विना फसय् थनाः थःगु झिलिमिलि छेँ थेंच्वंगु गठबन्धन सरकार गुगुं नं इलय् दुने फु धइगु अनुमान जनमानसय् मदुगु मखु । केपी ओलीयात चिइकेगु उद्देश्यं जक निर्मित गठबन्धन सरकार जूगुलिं व उद्देश्य छधी जुयाः पूवंकल । तर वयां लिपा छु ? धइगु खँय् गठबन्धनया दुजःपिं गुगुं देश, जनताया निंतिं प्रतिवद्ध खनेमदु । जबरजस्तीकथं एकतावद्ध । समान कार्यक्रमया चिउताः स्वयां मौका स्वयाः थःथःगु हित, फाइदाया निंतिं सनेगु हे गठबन्धनया दुजःतय् दाउ ।

एमसीसीया खँय् गठबन्धनया दुजःपिनि दथुइ हे मतभेद खनेदु । मत विभिन्नता लुइ । मतभेद खने दइगु आश्चर्यया खँ मखु । गुगुं नं खँय् दलतय् दथुइ मतभेद खनेदइगु स्वाभाविक खः । तर एमसीसीया खँय् मतभेदया नामय् गठबन्धन दुने गुगु खेल राजनीतिक दलतय् दथुइ जुल व छलकपटपूर्ण खनेदइ । उकिं देय्यात अकल्पनीय क्षति जुइगु सम्भावना दु । आन्तरिक कलहं जक मखु, वाह्य हस्तक्षेपं नं । एमसीसीया नामय् देशय् राजनीतिक दलतय्सं गुगु राजनीतिक खिचलो थनाच्वन । उकिं देशय् छगू ग्यानापुसे च्वंगु वातावरण थनीगु सम्भावना दु ।

एमसीसी बारे देशय् आन्तरिक द्वन्द्वं जक मखु, देशय् विश्वया ततःधंगु राष्ट्रतय् द्वन्द्वं नं प्रभावित याइ थें च्वं ! खतराया गं न्याइ थें च्वं ! देय् दुने नेतात थःथः मनोमानी धंगं ल्वाय् थें मखु । जब देय् पिनेया शक्तिशाली देय्तय् संघर्षया भूमि जुइ, देय्, जनतां उकिया लिच्वः फये फइमखु । जनता, देय् सर्वनाशया लँय् वनी । थ्यनी । चाइना व अमेरिका थौं विश्वया हे शक्तिशाली देय्त जुयाः खनेदइ । इमि दथुइ शीतकालीन युद्धया वातावरण लुया वयाच्वंगु दु । नेपालं थज्याःगु देय्तय् दथुइ सन्तुलित नीति काये मफुत धाःसा उकिया लिच्वः भयंकर जुइ । नेपाःया राजनीतिक नेतातय्सं सन्तुलित कुटनैतिक स्वापू विकास याये त्वःताःथीथी देय्या दलालया रुपय् थःत ब्वयेत स्वइ ।

छम्ह चीनया उच्च पदाधिकारीं नेपाःया नेतात कि ‘सीआईए’ कि ‘रअ’या एजेन्ट खः धकाः धाःगु ब्वनागु दु । वय्कलं धाथें थ्व धाःगु खःसा नेतातय् बारे छाय् थज्याःगु छाप छिमेकी राष्ट्रय् लाः वन ? अथे हे भारत, अमेरिकाय् थनया नेतातय् बारे छु छु छाप दु ? उकिया नं खँ वइ । थुकथं म्हुतुं नेतातय्सं राष्ट्रवादया खँ हइ । तर विदेशीतय्सं इमित छाय् नेपाःया राष्ट्रवादी नेतात खके मफुत ? थ्व गम्भिर न्ह्यसः जुइ ।
थौं देय्या राजनीतिया जक खँ जुइ मखु । अन्तर्राष्ट्रिय, भू राजनीति नं उतिकं महत्वपूर्ण जुइ । कूटनीतिक क्षेत्रय् गहन अध्ययन, अनुसन्धान, विश्लेषण यायेगु निकायत दयेकाः अन्य देशय् विदेशी नीति विज्ञत तयार याइ । थन थें स्याउलतसें विदेशी नीति निर्माण याइमखु ।

एमसीसी प्रधानमन्त्रीया पक्षं समर्थन याइ । प्रचण्ड पक्षं थःगु नीति स्पष्ट मयासे मनूतय्त भ्रमय् तइ । गुलिसिनं धाइ प्रचण्डया थ्व नाटक जक खः । अन्तय् वं समर्थन याइ । मेखे एमसीसी पास जुइ मखु । गठबनधन दुनी । भविष्यवाणी नं जुइ । गठबन्धन जक मखु, नेता माधव नेपाल व रामकुमारी झाँक्रीया बाहुबन्धन नं चब्बुइ थें च्वं ! रामकुमारी एमसीसीया समर्थक । माधव प्रचण्ड थें विरोधी । गठबन्धन भ· जूसां देय्यात थुने दइमखु । होशियार !