छक्वलं न्याम्ह मचा बुइकूपिं मां-अबु लय्ताः

येँ (नेपालभाषा टाइम्स) – नुवाकोटया छम्ह मिसां सोमवाः प्रसुति गृहय् छक्वलं न्याम्ह मचा बुइकूगु दु। नुवाकोटया सोमिका तामाङ अप्रेशन पाखें प्यम्ह म्ह्याय् व छम्ह काय् बुइकूगु खः, तर कायम्ह धाःसा सीम्ह बूगु खः । थुकथं छक्वलं न्याम्ह मचा बुइकूगु तसकं दुर्लभ घटना खः । थज्याःगु दुर्लभपूर्वक बुइकूपिं मस्त मध्ये नं म्वाःपिं प्यम्ह मिसामचा जूसां थःत तसकं भाग्यमानी तायेकागु व तसकं लय्ताःगु खँ मस्तय् अबु हरिकुमार तामाङ धाःगु दु ।

थौंकन्हय्या इलय् नं काय हे माः धाइपिं अप्वः दुगु इलय् नं बिबिसीलिसे खँ ल्हासें अबुम्ह तामाङं धाःगु दु, ‘छम्ह काय मदुसां दुपिं प्यम्ह म्ह्याय् खनाः जि तसकं लय् ताः, जिं थःत तसकं भाग्यमानी तायेकागु दु ।’

मांम्हेसिनं नं थःत भाग्यमानी तायेकूगु खँ तामाङं धाःगु दु। ‘मचा बुइ न्ह्यः थः नं म्वाइमखुला धकाः चिन्तां ख्वयाच्वनीम्ह मांम्ह नं सफल अप्रेशन लिपा भाग्यं म्वायेखंगु व छक्वलं थुलिमछि मस्तय् मां जुइ खंगुलिं थःत भाग्यमानी तायेकाच्वंगु दु’ तामाङं धाःगु दु। तामाङं मस्तय् मांया स्वास्थ्य अवस्था बांलाःगु खँ कंगु दु। चिकित्सकतय् सल्हा कथं पूवंक आराम कयाच्वंगु व आः मेपिनि बः कयाः न्यासि जुइफुगु खँ वय्कलं धयादीगु दु ।

प्यम्ह मस्त मध्ये स्वम्ह मस्त मांम्हेसित हे बीधुंकूगु दुसा छम्ह मचा धाःसा एनआइसियुलय् तयातःगु दु। बूपिं प्यम्ह मध्ये ८०० ग्राम जक दुम्ह मचायात एनआइसियलय् तयातःगु खः । मेपिं स्वम्ह मस्त बूगु इलय् १९ सय ग्राम, १८ सय ग्राम व १६ सय ग्राम दुपिं खः । छक्वलं थुकथं न्याम्ह मचा बुइकूगु घटना नेपालय् लिपां छुं दशक दुनेया हे न्हापां घटना जुइफुगु खँ अप्रेशनय् संलग्न चिकित्सक डा. कीर्तिपाल सुवेदीं धयादीगु दु ।

वय्कलं धयादीगु दु, ‘जिगु आःतकया अनुभव कथं नं छक्वलं न्याम्ह मचा बुइकूगु खनागु थ्व हे न्हापांगु घटना खः । विदेशय् नं थ्व तसकं दुर्लभ घटना खः।’

सोमिकां छक्वलं न्याम्ह मचा बुइकूगु वयागु पारिवारिक पृष्ठभूमिया कारणं नं जुइफुगु खँ डा. सुवेदीं कनादीगु दु। सोमिकाया मांया नं जुम्ल्याहा मचा दु। अथेहे सोमिका मचा दयेकेगु निंतिं थीथी प्रजनन उपचारय् संलग्न जुयाच्वंगुलिं नं थथे छक्वलं न्याम्ह मचा प्वाथय् च्वंगु जुइफुगु खँ नं डा. सुवेदीं धयादीगु दु । सोमिकाया अप्रेशनय् डा. दिप्ती श्रेष्ठ व डा. नमिता सिब्देन नं संलग्न दुगु खँ अस्पतालं धाःगु दु ।

सम्बन्धित बुखँ

LEAVE YOUR COMMENTS