थाय्थासय् अपांगमैत्री लँ दयेकीगु

येँ (रासस) – डिभिजन सडक कार्यालय, येँनं थीथी थासय् अपाबमैत्री लँ दयेकीगु जूगु दु। चालु आर्थिक दँया न्हापांगु चौमासिकय् डिभिजनं दयेकूगु योजनाय् न्यासि वनीपिनिगु निंतिं ध्यानय् तयाः योजना दयेकूगु खः ।

दकलय् न्हापां सिंहदरबार जःखः अपाबमैत्री लँ दयेकेगु ज्या न्ह्यायेधुंकूगु खँ डिभिजन प्रमुख कुवेर नेपालीं कनादीगु दु। वय्कःया कथं न्यासि वनीपिं लँजुवाःतय् चाप अप्वः दुथाय् न्हापां लँ दयेकेगु सुरु याःगु खः । वय्कलं फुक्कं सतकय् बुलुहुँ थज्याःगु पैदलमार्ग दयेकेगु खँ धयादीगु दु ।

डिभिजनं अप्वः न्यासि वनीपिं लँजुवाःतय् चाप दइगु व आः दयेकाच्वंगु तःधंगु सतकय् नं अपाब्गमैत्री लँ दयेकेगु योजना दयेकातःगु दु। आः दयेकाच्वंगु गौशाला चाबहिल सतकय् अपांगमैत्री सतकय् दयेकेगु ज्या न्ह्याकागु खँ प्रमुख नेपालीं कनादीगु दु। अथेहे सतक दयेकेगु निंतिं निर्माणस्थल खाली यानाच्वंगु कोटेश्वर जडीबुटी सतकय् नं पैदलमार्ग दयेकेगु खँ वय्कलं धयादीगु दु ।

वय्कलं धयादीगु दु, ‘सरल, सहज व अपांगमैत्री लँपु दयेकेबलय् सकसितं न्यासि जुइत अःपुइ ।’