डन गणेश लामायात पेस्तोलसहित ज्वन

येँ – चर्चित डन गणेश लामायात प्रहरीं पेस्तोल व गोलीसहित बुधवाः बहनीं गौशालां ज्वंगु दु । गौशालाया होटल पशुपति भिजन गोली चले जुइवं थ्यंगु प्रहरी टोलीं लामायात पेस्तोल व गोली सहित ज्वंगु खः । लामापाखें प्रहरीं चाइनिज ५४ पेस्ताव व उकी खुगू राउण्ड गोली बरामद याःगु खँ धाःगु दु ।
लामां धाःसा थःत म्हमसिउम्हेस्यां गोली कयेकः वःबलय् वयागु हे पेस्तोल लाका कयागु बयान बिउगु दु ।
छगू इलय् काभ्रेली समूह धयागु नां तयाः आतंक न्यंकाच्वंम्ह लामा वंगु प्रदेश चुनावय् कांग्रेसपाखें उम्मेदवार जूम्ह खः । काभ्रेया क्षेत्र नं. १ प्रदेश सभा २ लय् लामा एमालेया चन्द्र लामा पाखें पराजित जूगु खः ।
लामायात सम्पत्ति सुद्धिकरण मुद्दा न्ह्यानाच्वंगु दु । अकूत सम्पत्ति कमे याःगु द्वपनय् जेल लाःबलय् व स्वंगू करोड धरौती तयाः पिहां वःगु खः । छगू इलय् व विजय गच्छेदारया लोकतान्त्रिक फोरमया केन्द्रीय सदस्य जुयाच्वंम्ह लामा फोरम कांग्रेसय् बिलय जुइवं कांग्रेस पाखें हे प्रदेश सभा उम्मेदवार जूगु खः ।