बुगंद्यःयात भदाै २६ गते दुने बुंगय् बिज्याकीगु

यल- बुगंद्यःयात वइगु भदाै २६ गते तकया दुने बुंगय् बिज्याकीगु जूगु दु । म्हिगः बिहीवाः बुंगद्यःयात जबर्जस्ती सालेगु ज्या लिपा सराेकार गुथि, खलःपुचः दथुइ च्वंगु बैठक लिपा साइत स्वयाः सम्भव दतले वइगु २६ गते तकया दुने बुंगय् लितबिज्याकेगु क्वछिउगु खः ।

बैठकया निर्णय कथं थाैं क्षमा पुजा याइसा कंस २१ गते साेह्रखुट्टेपाटी तक द्यः सालाः छ्वयलाभु याइ । अथेहे २२ गते न्यायेका साइट स्वयेगु ज्या याइ । साइटया न्हिकुन्हु द्यःयात बुंगय् बिज्याकी ।

जात्राया लिसे सम्बन्धित १९ गू खलः पुचःपाखें मंकाः वक्तव्य जारी यासें थाैंकन्हय् खनेदयाच्वंगु काेराेनाया महामारीया कारणां जात्राया मेमेगु विधि, पुजा फुक्कं अाः द्यः दीकातःथाय् हे यायेगु व लिपाया दँय् न्हापा न्हापा थें जात्रा न्यायेकेगु खँ नं धयातःगु दु ।

वक्तवय् म्हिगः जात्रा लिसे असम्बन्धित मनूतयसं छुं आधिकारीकता विना हे द्यः सालेगु ज्या याःगु व थ्व इलय् जूगु अराजक ज्या प्रति १९ गुलिं खलः पुचःया ध्यानाकर्षण जूगु व थज्याःगु ज्या प्रति खेद प्वंका धयातःगु दु । वक्तव्य ज्यापु समाज, शिल्पकार समाज, स्यस्यः समाज, बाैद्ध विहार संघ, ताम्राकार समाज, बाराही समाज, राजाेपाध्याय समाज, तण्डुकार समाज, नापित समाज, कपाली समाज, वाद्यकार समाज, खडगी समाज, जाेशी समाज, देउला समाज, रजक समाज, चित्रकार समाज, राजकर्णिकार समाज व मंकाः खलः यलया नायः वा प्रतिनिधिपिंसं हस्ताक्षर यानातःगु दु ।

वक्तवय् स्वयादिसँ