हवाई बुकिङ शुरु

येँ (नेपालभाषा टाइम्स) – कोरोना महामारीया कारणं सरकारं तयातःगु लकडाउन लिपा कन्हय्निसें न्हापांखुसी चालेत्यंगु आन्तरिक उडानया निंतिं शनिवाः तकया दुने ५० प्रतिशत बुकिङ जूगु दु। लकडाउनया कारणं खुला तक बन्द जुइधुंकूगु आन्तरिक उडानयात आः स्वास्थ्य मापदण्ड पूवंकाः कन्हसंनिसें सुरु यायेत्यंगु खः । आन्तरिक उडान सुरु जुइगु जुइवं शुक्रवाःनिसें बुद्ध एयरलाइन्स, श्री एयरलाइन्सं बुकिङ सुरु याःगु खः । सुरुया बुकिङ सन्तोषजनक जूगु खँ वायुसेवा सञ्चालक संघया प्रवक्ता योगराज कँडेलं शर्मां धयादीगु दु। आन्तरिक उडानय् हवाइजहाजया क्षमता कथं हे यात्रुत तयेदइगु जूगुलिं हवाइ उडानया भाः नं थहां मवंगु खँ वय्कलं धयादीगु दु ।