जसपा सरकारय् मवनेत सांसदतय् बिस्कं बैठक

येँ – जनता समाजवादी पार्टीयात सरकारय् वने मजिउ धासें जसपाया सांसदत बिस्कं बैठक च्वंगु खँ सीदुगु दु । सांसदतय्सं आःया इलय् सरकारय् वनेमजिउ धासें थ्व मोर्चाबन्दी दयेकूगु खः । थुपिं सांसदतय्सं पार्टीयात सरकारय् वनेगु पाखें पनेत रणनीति दयेकेत सहलह ब्याकाच्वंगु खँ धाःगु दु ।

थ्व मोर्चाबन्दीया बारे डा. बाबुराम भट्टराईया स्वकीय सचिव रोशन पोखरेलं धाःसा थःपिंत थुकिया जानकारी मदुगु खँ धयादीगु दु । संसदीय दलया बैठक नं मच्वंगु धासें वय्कलं छुं छुं सांसदपिं सल्लाह यायेगु निंतिं मुंगु जुइफइगु खँ धयादीगु दु ।

संसदीय दलया बैठक मखयेक हे सांसदत संसदीय दलया ज्याकुथिइ मुंगुयात धाःसा अर्थपूर्ण रुपं काःगु दु । थ्व बैठकय् सहभागी सांसद स्वत्तस्फुर्त रुपं बैठक च्वंगु मखसें छगू ‘डिजाइन’ अन्तर्गत बैठक च्वंगु आशंका नं यानाहःगु दु । थ्व बैठकय् सहभागी अप्वः थें सांसदत न्हापा केपी ओलीं पार्टी विभाजनया अध्यादेश हःगु इलय् उकियात समर्थन याःपिं खः । अथे जूगुलिं आः हाकनं जसपायात कुचा यायेगु षडयन्त्र जुयाच्वंगु आशंका जुयाच्वंगु खः ।

आइतवाःया बैठकय् सांसदपिं इस्तियाक राइ, प्रदीप यादव, रेणुका गुरुङ, एकवाल मियाँ, दुलारी खत्वे, अमृता अग्रहरि, रानी मण्डल, उर्मिला यादव, निरमाया ढकाल, रामबाबु यादव, उमाशंकर अरगरियापिं दुथ्याःगु खँ धाःगु दु ।