स्वयंसेवी रक्तदाता समाजया अपील

येँ (नेपालभाषा टाइम्स) – नेपाल स्वयंसेवी रक्तदाता समाजं कोभिड-१९या संक्रमणयात ध्यानय् तयाः नेपाल सरकारं जारी याःगु सार्वजनिक हितया उपाय अवलम्बन यानाः हिदान ज्याझ्वःयात नियमित यायेत व निरन्तरता बीत इनाप याःगु दु ।

स्वयंसेवी हिदाता, हिदान ज्याझ्वः याइगु संघसंस्था, हिदान याइपिं व हिदानप्रति सद्भाव तइपिं सकसितं कोरोना भाइरसया महामारीपाखें बचे यायेत व याकेत नेपाल सरकार व मातहतया निकायपाखें जारी याःगु सार्वजनिक हितया उपाय अवलम्बन यायेत व याकेत नं समाजं विशेष इनाप याःगु दु ।

हि व हिया तत्वया मूलस्रोत हिदातात स्वयं जूगु व इमिगु स्वास्थ्यय् ध्यान बीगु व सतर्कताया निंतिं समाजं थःगु थासं भूमिका म्हिता वयाच्वंगु धासें हिदानप्रति ग्वाहालि याइपिं, सद्भाव तइपिं व पीडित पक्षयात आवश्यककथं हि व हिपाखें तयार जुइगु तत्वया आपूर्तिइ समस्या मवयेकेत नं समाजं इनाप याःगु दु ।

स्वस्थ्य व सुरक्षित जुयाः हिदान यायेगु ज्यायात नियमित व निरन्तरता बीगु, हिदान यायेत वनेबलय् हुलमुलपाखें तापाक च्वनेगु व भौतिक दूरी काय यायेगु, फत्तले रक्तसंचार केन्द्र वा सुरक्षित थासय् हिदान शिविरय् हिदान यायेगु, ग्वसाः खलकं हिदाता व ज्याझ्वलय् सहभागि दथुइ हिदान शिविर हुलमुल जुइगुपाखें बचे यायेगु, हि संकलन यायेत संचालन याइगु शिविरय् साब्वं, लः व स्यानिटाइजरया व्यवस्था याके बीगु लगायत थीथी गुंगू बुँदाया अपिल समाजं जारी याःगु दु ।