भूगोल पार्कय् भूकम्प सुरक्षा दिवस

येँ – वि.सं. १९९० साल माघ २ गतेया विनाशकारी तःभुखाय्या लुमन्तिइ म्हिगः देय्न्यंकं थीथी ज्याझ्वः यासें नीछक्वःगु राष्ट्रिय भूकम्प स्मृति दिवस न्यायेकल । थुगुसी ‘विपद्पाखें सुरक्षित जुइगु नागरिकया अधिकार, पूरा यायेत जिम्मेवार संघ, प्रदेश व स्थानीय सरकार’ धइगु नारा बियाः थ्व दिवस न्यायेकूगु खः ।

थ्व झ्वलय् थनया भूगोलपार्कय् जूगु ज्याझ्वलय् गृहमन्त्री रामबहादुर थापा मूपाहांकथं झायादीगु खः । गृहमन्त्री थापां भुुखाय्या जोखिमं बचे जुइत सुरक्षित संरचना निर्माण यायेमाःगु नापं इलय् आवश्यककथंया व्यवस्था यायेमाः धासें उकिया निंतिं सकलें सचेत जुयाच्वनेमाः धयादिल ।

‘भुखाय् धइगु पूर्व सूचना बियाः वइमखु थ्व प्राकृतिक रुपं वइगु विपद् जूगुलिं थुकिया जोखिमपाखें थः जक सुरक्षित जुइगु मखसे मेपिंत नं सुरक्षा यायेगु उपाय धइगु हे सुरक्षित भवन व थ्वप्रति मंकाः प्रतिवद्धता प्वंकेमाः’ वय्कलं धयादिल ।

ज्याझ्वलय् येँ महानगरपालिकाया प्रमुख विद्यासुन्दर शाक्यं भवन निर्माण संहिता कार्यान्वयनय् ग्वाहालि यायेत निर्माण पक्षयात इनाप यासें वइगु दिनय् नं भवन निर्माण यायेबलय् महानगरपालिकाया पूर्व स्वीकृति मकासे निजी व गुगुं नं सरकारी भवनया संरचना दयेके मदइगु स्पष्ट यानादिल ।

अथे हे महानगरपालिका अन्तर्गतया विपद् व्यवस्थापन समितिया संयोजकनापं येँ मनपा २५ वडाया वडाअध्यक्ष नीलकाजी शाक्यं वडा तहय् गठन यानातःगु विपद् व्यवस्थापन व नागरिक सुरक्षा समितिपाखें वडावासी नापं आम नागरिकयात सुरक्षित महसुस जुइकथं तीव्र रुपं ज्या जुयाच्वंगु जानकारी बियादिल ।

वि.सं. १९९० माघ २ गतेया तःभुखाचय् लानाः मदुपिनिगु लुमन्तिइ सुरक्षित बस्ती निर्माणय् थौंया न्हू पुस्तायात नं सहभागि याकेगु उद्देश्यं २०५५ सालनिसें थुकथं दँय्दसं माघ २ गते भूकम्प सुरक्षा दिवस हनेगु याना वयाच्वंगु खः । गृहमन्त्री थापा व येँ मनपाया प्रमुख शाक्यं महानगर विपद् व्यवस्थापन विभागं तयार याःगु याःगु टेलिफोन सम्पर्क सपूmया नं पितब्वज्या यानादीगु खः ।

लिसें भूगोल पार्कय् भुखाचय् लानाः मदुपिनिगु लुमन्तिइ धस्वाकातःगु स्मृति स्तम्भय् गृहमन्त्री थापा, येँ मनपा प्रमुख शाक्य, थीथी वडाया वडाअध्यक्ष, जनप्रतिनिधि लगायतं स्वां देछानादीगु खः ।

 

सम्बन्धित बुखँ

LEAVE YOUR COMMENTS