स्वास्थ्यकर्मीयात जोखिम भत्ता बीगु

येँ – सरकारं कोरोना संक्रमण व महामारीया इलय् जोखिमपूर्ण ज्या याःपिं स्वास्थ्यकर्मीतय्त जोखिम भत्ता बीगु जूगु दु । अर्थ मन्त्रालयं संक्रमणया महामारीया इलय् अग्रपंक्तिइ च्वनाः ज्या याःपिं स्वास्थ्यकर्मीतय्त जोखिम भत्ता बीगु निर्णय याःगु खः ।

अर्थमन्त्री जनार्दश शर्मां मन्त्रालयया पदभार ग्रहण याःगु हे दिंकुन्हु संक्रमणया जोखिमया इलय् अग्रपंक्तिइ च्वनाः खटे जूपिं स्वास्थ्यकर्मीतय्त जोखिम भत्ता निकासा यायेगु निर्णय यानादीगु खः ।

मन्त्रालययाकथं स्वास्थ्यकर्मीतय्त जोखिम भत्ता वापत ६५ गू करोड १४ गू लाख तका बजेट तकं स्वीकृत याःगु दु । सरकारं अग्रपंक्तिइ खटे जूपिं स्वास्थ्यकर्मीतय्त भत्ता उपलब्ध मयाकूगु धासें असन्तु्ष्टि प्वंका वयाच्वंगु इलय् नवनियुक्त अर्थमन्त्रीं जोखिम भत्ता उपलब्ध याकेगु निर्णय यानादीगु खः ।

अग्रपंक्तिइ खटे जूपिं स्वास्थ्यकर्मीयात जोखिम भत्ता उपलब्ध मयाकूगु धइगु खँय् तत्कालीन सरकारया नं व्यापक आलोचना जुया वयाच्वंगु खः । स्वास्थ्य तथा जनसंख्या मन्त्रालयं अग्रपंक्तिइ खटे जूपिं स्वास्थ्यकर्मीयात जोखिम भत्ता उपलब्ध व्यवस्था याःसां वीर अस्पतालया स्वास्थ्यकर्मीतय्सं नं दछि न्ह्यवंनिसेंया भत्ता कायेमखंगु धासें असन्तुष्टि प्वंका वयाच्वंगु खः ।

वीर अस्पताल जक मखसे संक्रमणया महामारीया इलय् अग्रपंक्तिइ खटे जूपिं पाटन अस्पताल, त्रिवि शिक्षण अस्पताल, सिभिल अस्पताल लगायत आपालं अस्पतालया स्वास्थ्यकर्मीतय्सं जोखिम भत्ता उपलब्ध यायेत इलय् व्यलय् माग याना वयाच्वंगु दु ।

सम्बन्धित बुखँ

LEAVE YOUR COMMENTS