तिथि तुतं ब्वलंगु विवाद बारे

नेवाःतय्सं हनावयाच्वंगु थीथी नखःचखः व जात्रापर्वय् विवाद ब्वलनेगु यानाच्वंगु दु । थुगुसी नं बुंगद्यःया जात्रायात कयाः विवाद ब्वलंगु दु । व खः बुंगद्यःया खः सालेगु तिथि । खतुं आः उगु विवाद ज्यने नं धुंकूगु दु । तर विवाद गुकथं ब्वलन व बुंगद्यःया जात्रा गुबलय् जुइ धइगु बारे पञ्चांग निर्णायक समितिया दुजः लिसें चर्चित ज्योतिष कीर्तिमदन जोशीयाके न्यनेकने यायेगु झ्वलय् वय्कलं कनादीगु खँ थन न्ह्यब्वया च्वना ।

थुगसी नं बुंगद्यः गबले सालेगु धइगु खँय् विवाद वःगु दु । बुंगद्यःयात न्ह्याबलें नं बछलाथ्व पारु कुन्हु रथय् बिज्याकीगु खःसा थुगुसी धाःसा दुतिया तिथि तुत् जूगुलिं छथ्वःसिनं बुंगद्यःया खः (रथ) पञ्चमिकुन्हु साले माःगु खँ हयाच्वंगु दु । थ्व खँ पिहां वयेवं बुंगद्यःया खः सालेगु विषयय् विवाद ब्वलंगु खः । तर ज्योतिष जोशीं थ्व खास हे विवादय् हयेमाःगु विषय मखु धासें न्ह्यःने धयादी, ‘झी नेवाःतय्सं न्यायेका वयाच्वनागु गुगुं नं नखःचखः, जात्रापर्व चन्द्रमासया तिथिकथं न्यायेका वयाच्वनागु जूगुलिं गबलें गबलें थ्व हे चन्द्रमास तिथियात कयाः छथ्वः गैरनेवाःतय्सं थुकियात विवाद ब्वलंकेगु कुतः याना वयाच्वंगु दु ।

छुं नं दिन तुत् वा छन्हु अप्वः जुइगु धइगु पूवंक व न्हिं हे मदइगु मखु, सुद्र्यःया तेजं उगु दिन लुप्त जक जुइगु खः ।’ थज्याःगु विवाद वि.सं. २०२९, २०४८, २०५० व २०६७ सालय् नं वःगु खँ कनादिसें वय्कलं २०६७ सालय् यल प्रमुख जिल्ला अधिकारी नित्यराज पाण्डेया कुतलय् स्वन्हुतक सहलह यानाः छगू मंकाः निर्णय जुइधुंकाः वयां लिपा पञ्चांग निर्णायक समितिया छम्ह दुजः सूर्यप्रसाद ढुंगेल दथुइ वयाः २००४ सालय् तत्कालिन पञ्चांग समितिया दुजः बाबुराम शर्माया नां तकं उल्लेख मदुगु छगू टिपोट क्यनाः पञ्चमिकुन्हु द्यः साःगु धकाः धाल । थ्व खँयात कयाः थम्हं बाबुराम शर्मा २००४ सालया निर्णय क्यनाबलय् सूर्यप्रसाद ढुंगेल नाजवाफ जूगु जानकारी नं वय्कलं बियादिल ।

वय्कलं कनादीकथं यदि तिथि सम्बन्धी छुं नं कथंया विवाद वल धाःसा पञ्चांग निर्णायक समितिं दकलय् न्हापां गुथि संस्थानयाके न्यनी, गुथि संस्थानं छु गज्याःगु व्यवस्था जुयाच्वंगु दु धकाः सम्बन्धित पुजारीयात न्यनी । पुजारीया लिसः वयेधुंकाः गुथिं संस्थानं हाकनं पञ्चांग निर्णायक समितियात थःगु खँ छ्वइगु व वयां लिपा निर्णय यायेगु ज्या जुयाच्वंगु दु । वंगु माघ ३ गते नीम्ह मनूखंं छम्ह निम्ह नेवाः विरोधी निर्णायक समितिया सलय् सः तयाः विरोध याःगु धासें वय्कलं धयादी ‘जोशीतय्के तिथिया विषयय् ज्ञां हे मदु अज्याःपिंसं खाली विवाद जक पिकयाः जनमानसय् भ्रम ब्वलंकेगु यानाच्वंगु दु ।’

वय्कलं पञ्चमि तिथि कुन्हु द्यः साले मजिउगु खँ कनादिसें न्ह्यःने धयादि, ‘न्हापा न्हापा द्यः रथय् बिज्याकी कुन्हु हे द्यः सालाः मण्डप पाटी तइगु खः तर, वंगु पीदँ न्ह्यःनिसें थ्व ज्या दिनाच्वंगु दु । पीदँ न्ह्यःनिसें पसुकां सालेभाय् यानाः द्यः मसासें अन हे तयातइगु खः । अले चतुर्थी कुन्हु द्यः सालाः गाबहालय् जात्रा न्यायेकेगु यानाच्वंगु दु ।’वय्कलं पुलांगु परम्परायात न्हापा थें तुं न्ह्याकेमाःगु खँ कनादिसें प्यन्हु बिकाः याइगु ज्याझ्वः धयागु भोटो क्यनेगु व बुंगद्यः बुंगय् बिज्याकेधुंकाः वनीगु प्यन्हु विचाः जक न्हिं कथं यानाच्वंगु खँ कनादिल ।

वय्कलं धयादिल, ‘लगं ख्यलय् नैंक्यालं लुकेधुंकाः साइट पिकयाः जक द्यःसालाः जाह्वलाख्यलय् थ्यंगुया प्यन्हु लिपा भोटो क्यनेगु यानाच्वंगु खःसा अनं बुंगद्यः बुंगय् यंकेधुंकाः प्यन्हु दुकुन्हु ‘प्यन्हु विचाः वनेगु’ धकाः बुंगय् वनिगु खः ।’ वय्कलं धयादी, ‘जिके २३१ दँ निसेंया वंशावली दु, उकी गनं नं पञ्चमि कुन्हु जात्रा यायेगु धकाः च्वयातःगु मदु, नेपाल संवत् ९०४ या वंशावली नं जिके दु, उकी नं पञ्चमि कुन्हु जात्रा न्यायेकेगु धकाः गनं नं न्ह्यथनातःगु मदु ।’

सम्बन्धित बुखँ

LEAVE YOUR COMMENTS