गुंलाया न्यकू धलं दनेगु क्वचाल

ख्वप – थनया तापलाछि शिवरात्री गुथि व पुलांसः शिवरात्री गुथिया मंकाः ग्वसालय् न्ह्याःगु गुंलाज्वःछि न्ह्याःगु क्वनेया पुलांसः न्यकू धलं दनेगु ज्या क्वचाःगु दु । गुंला लछियंकं धलं दनेगु झ्वलय् द्यः थाःगु चीभाः दक्वं दकलय् लिपांगु न्हि वंगु यंलाथ्व पारुकुन्हु ख्व¥हँया खुसिइ चुइकूगु खः ।

द्यःभारी न्हय्म्ह, मूकजि व कजिनापं प्यम्ह, याकी प्यम्हनापं मुक्कं न्यय्न्हय्म्हेसिनं न्हियान्हिथं धलं दंगु खः । स्थानीय ज्ञानबहादुर मानन्धरं कनादीकथं द्यःभारी जुइम्ह छम्ह बाहेकं मेपिं सकलें मिसात हे जक वानाः धलं दनेज्या जूगु खः । वंगु साउन २७ गतेनिसें शुरु धलं दनेगु शुरु जूगु खः ।

थ्व स्वयां न्ह्यः गथांमुगःचः¥हे कुन्हु चान्हसिया इलय् पूर्वय् च्वंगु कमलपुखू, पश्चिमय् च्वंगु तःपुखू (सिद्धपुखू), उत्तरय् कासां खुसि व दक्षिणया ख्व¥हं प्यंगू थासं नीलः हयाः धलं दनेत माःगु तयारी न्ह्याकूगु खः । थुपिं प्यंगू थासं लः हयेधुंकाः धलं दनेगु थाय् क्वःछीगु चलन दु ।

धलं दनेगु झ्वलय् सापारु लिपा देश भ्रमणकथं नमुरा, सक्वया वज्रयोगिनी, स्वयम्भू, च्वबहाःलिसें किपूया थीथी थासय् च्वंगु बहाःया भ्रमण याकूगु खः । धलं दनेगु झ्वलय् न्यागः न्यागः चीभाः थाइगु खःसा विधिवत रुपं मन्त्र ब्वनाः सवालाख चीभाः थाइगु थ्व धलं दनेगु ज्या थुगुसी क्वःने जक जुगु खः ।