पाकिस्तानय् बस व ट्रक ल्वानाः ३० म्ह सित

पाकिस्तानया पञ्जाबय् बस व ट्रक ल्वानाः जूगु दुर्घटनाय् लानाः ३० म्ह मनू सीगु दु । दुर्घटनाय् लानाः ४०म्ह सिबें अप्वः घाःपाः जूगु खःसा प्यम्हेसिगु अवस्था गम्भीर दु । सोमवाः सियालकोटं राजनपुरय् वनाच्वंगु बस मुजफरगढय् च्वंगु डेरा गाजी खानया इन्दुस हाइवेलय् ट्रकनाप ल्वानाः दुर्घटना जूगु खः । दुर्घटनाय् मस्त व मिस्त नं लाःगु खःसा दुर्घटनाय् लाःपिं इद न्यायेकेत थःपिंनिंगु छेँय् वनाच्वंपिं खः ।

डेरा गाजी खानया कमिश्नर इरशाद अहमदं दुर्घटनाय् २९ म्ह सीगु खँया पुष्टि याःगु दु । कमिश्नर अहमदं घाःपाः जूपिं सकसिंगु उद्धार जुइधुंकूगु व अस्पतालय् वासः जुयाच्वंगु नं जानकारी बिउगु खः । अस्पताल प्रशासनं अस्पतालय् हपिं मध्ये छम्ह सीगु व प्यम्ह सिकिस्त जूगु जानकारी बिउगु खः ।