येँ महानगरय् छन्हुया दुने खुम्ह सित, मुक्कं महानगर कोरोना संक्रमित

येँ (नेपालभाषा टाइम्स) – येँ महानगर दुने वंगु भदौ १ गते छन्हुया दुने खुम्ह कोरोना संक्रमणं सीगु दु। येँ महानगरपालिका जनस्वास्थ्य महाशाखां उपलब्ध याःगु तथ्यांककथं वडा नं. १० य् स्वम्ह, वडा नं. १२, १५ व २७ य् छम्ह, छम्ह यानाः खुम्ह कोरोना संक्रमित सीगु दु ।

महाशाखायाकथं संक्रमणं मेपिं नं सीगु दयेमाःगु तर, थःपिनिगु तथ्यांकय् मवःगु नं जुइ फुगु स्वास्थ्य अधिकृततय्सं धाःगु दु। वंगु भदौ १ गते येँय् १३९, यलय् १५ व ख्वपय् १४म्ह यानाः स्वनिगलय् जक १६८ म्ह कोरोना संक्रमित थप जूगु स्वास्थ्य तथा जनसंख्या मन्त्रालयं नियमित पत्रकार सम्मेलनपाखें जानकारी बिउगु खः ।

भदौ १ गते स्वनिगलय् कोरोना संक्रमण पुष्टि जूपिं १६८ म्हमध्ये येँय् जक १३९ म्ह दुगु खःसा उकिसनं येँ महानगर दुने जक ११३ म्ह न्हूपिं संक्रमित थप जूगु खः । इपिडिमियोलोजी तथा सरुवा रोग नियन्त्रण महाशाखां येँ महानगरया जनस्वाथ्य महाशाखायात उपलब्ध याकूगु विवतणकथं महानगर दुने थप जूपिं ११३ म्हमध्ये १६ म्हेसिया वडा खुले मजूगु सी दुगु दु ।

न्हूपिं संक्रमित थप जूगुमध्ये दकलय् अप्वः वडा नं. २ य् १९म्ह दुसा थ्व स्वयां न्ह्यः छम्ह नं संक्रमित खने मदुगु धयातःगु वडा नं. २ लय् नं निम्ह संक्रमित खनेदयेवं महानगरया दक्वं वडा कोरोना संक्रमित जूगु दु ।

वंगु साउन मसान्ततक ९५५ म्ह कोरोना संक्रमित दुगु महानरय् भदौ १ य् थप जूपिं ११३ नापं यानाः संक्रमितया ल्याः १०६८म्ह थ्यंगु दु। थुकी कोरोनामुक्त जूपिनिगु ल्याः दुथ्यानाच्वंगु मदु ।