ने. सं. ११४६ बछलागा पञ्चमी -

मांम्ह मंत, कायम्ह आईसीयुलय्, भौम्ह अस्पताल भर्ना

छखा हे छेँया स्वम्ह प्रभावित

येँ – देय्न्यंकं न्यना वनाच्वंगु डेंगुपाखें राजधानी येँ देय्या भित्री नगर दुने नं गाक्कं लिच्वः लाका हःगु दु । थ्व झ्वलय् येँया लगमय्च्वंगु छगू हे छेँया स्वम्ह दुजःयात डेंगु ल्वचं कःगु दुसा उकी मध्ये छम्हसिया मृत्यु जूगु दु । छगू हे परिवारया मां, भौ व काययात डेंगु ल्वचं कःगु खःसा मांम्ह प्यन्हुजालय् मदुगु खः ।

छुं ई न्ह्यः तिनि करिब ५० दँ दुम्ह नरेशमान तुलाधरयात डेंगु जुयाः थापाथलीया नर्भिक अस्पतालय् भर्ना याःगु खः । वय्कःया स्वास्थ्य सुधार मजूगुलिं आः तकं आईसीयुलय् तयाः वासः याकातःगु दनि । वय्कःयात अस्पताल भर्ना याःगुयां छुं न्हि लिपा वय्कःया तताःजुयात नं डेंगु ल्वचं कःगु खःसा वय्कःयात नं आः नर्भिक अस्पतालय् हे वासः याका तःगु दु ।

अनं लिपा तुलाधरया ८१ दँ दुम्ह मां तीर्थलक्ष्मी तुलाधरयात नं डेंगुं थिउगु जुयाच्वन । लिपा वय्कःयात नं नर्भिकय् वासः याकूगु खः । तर अन वासः याकुयाकुं प्यन्हु– जालय् वय्कः मंत ।विदेश वनाच्वंम्ह म्ह्याय्म्ह लिहां वयेवं म्हिगः तिनि थनया कर्णदिपय् वय्कःया अन्त्येष्टि जुल । वय्कः न्यत तुलाधर कवःया दुजः खः ।

आईसीयुलय् वासः याकातःम्ह नरेशमान तुलाधर नेपालभाषा ख्यःया पुलांम्ह कार्यकर्ता नं खः ।उकुन्हु तक तराई लागाय् जक प्रभावित जुयाच्वंगु डेंगु राजधानीइ नं व्यापक रुपं सरे जुयाच्वंगु खँ थुकिं बांलाक प्रस्ट जूगु दु । छखा हे छेँया स्वम्ह दुजःपिं डेंगुपाखें प्रभावित जुयाः छम्हेसिया ज्यान तकं वंगुलिं परिवारया मेपिं दुजःपिंत नं ग्यानाच्वंगु खँ धाःगु दु ।

परिवारया छम्ह दुजः मदयेवं वय्कःपिंसं छेँ व जःखः तुरुन्त हे वासः नं छ्वाकेधुंकूगु दु ।डेंगु जुइवं ज्वर वयाः तुरुन्त हे मनूया ज्यान तकं वने फुगु जूगुलिं थ्वपाखें बचे जुयाः च्वने माःगु खँ विज्ञतय्सं धयाहःगु दु । येँय् डेंगुया प्रभाव खने दयेवं येँ महानगरपालिकां त्वाःत्वालय् डेंगुया वासः छ्वाकेगु व मलम इनेगु ज्या शुरु याःगु खः ।

थौंकन्हय् येँ देय्या फुक्क धइथें हे अस्पतालय् डेंगुया विरामीत क्यं वयाच्वंगु दुसा गुलिखे भर्ना नं याना तःगु दु । थ्व इलय् सुयातं ज्वर वल धाःसा तुरुन्त हे क्यनाः वासः यायेत डाक्टरतय्सं सल्लाह बियाच्वंगु दुसा न्हिनय् वइपिं पत्तितपाखें बचे जुइत नं सतर्क याःगु दु । डेंगु विरामीयात न्याःम्ह पत्तिं मेम्हेसित न्यात धाःसा थ्व ल्वय् याकनं सरे जुइ ।