थिमिइ सांस्कृतिक क्षेत्र बारे अभिमुखीकरण

थिमि(नेपालभाषा टाइम्स)- मध्यपुर थिमिइ सांस्कृतिक संरक्षित क्षेत्रयात कयाः अभिमुखीकरण ज्याझ्वः जुल । मध्यपुर थिमिया आदर्श माध्यमिक विद्यालयय् सांस्कृतिक संरक्षित क्षेत्रलिसें मौलिक स्थान नामया विषययात कयाः उगु ज्याझ्वः जूगु खः ।

ज्याझ्वलय् नेवाः देय् दबू स्वनिगः विशेष प्रदेशया नायः श्रीकृष्ण महर्जनं नेवाः सांस्कृतिक संरक्षित क्षेत्रया बारे ध्वाथुइकादीगु खः । वय्कलं आदिवासीतय् शक्ति पुर्खां दयेकाथकूगु जात्रा, पर्व, संस्कृतिलिसें प्रकृतिं बियातःगु जल, जमिन, जंगल खः धासें उकियात पुस्तान्तरण याना वनेमाःगु खँय् बः बियादिल ।

मेम्ह प्रशिक्षक नेवाः देय् दबूया केन्द्रीय न्वकु रश्मिला प्रजापतिं संविधानकथं जातीय, भाषिक, सांस्कृतिक व राजनीतिक अधिकार प्राप्तिया निंतिं नेवाःतय्त सचेत याना यंकेगु देय् दबूया उद्देश्य जूगु खँ कनादिल ।

आदर्श मा.वि. लाय्कूया प्रधानाध्यापक बुद्धिकुमार घों श्रेष्ठं न्हापा नेपालभाषा संघर्ष समितिपाखें स्थानीय तहय् भाषिक अधिकार प्राप्तिया निंतिं थःपिंसं यानागु थीथी गतिविधि व ज्याझ्वःया बारे कनादीगु खः । लिसें वय्कलं आः नेवाःतय्सं नं लोकसेवा आयोग व शिक्षक सेवा आयोगय् प्रतिस्पर्धा यायेमाःगु ई वःगु दु धयादिल ।