लुँयागु भाः थहां वनाः लुँवहः व्यवसाय ठप्प

येँ (नेपालभाषा टाइम्स) – लुँया भावय् हाकनं छकः न्हूगु रेकर्ड कायम जूगु दु। थाै‌ं लुँया भाः ताेलाया १ लाख ३ हजार ५०० थ्य‌ंगु दु । अथेहे वहया भावय् न‌ं रेकर्ड कायम यासे‌ं ताेला १४०५ तका थ्य‌ंगु दु । म्हिगः नेपाःया लुँवहः बजारय् लुँ छतोलाया १ लाख २५०० तका कायम जूगु खः । वहःया भा धाःसा वंगु असारया मध्यपाखे ताेलाया १३५० तका तक थ्य‌ंगु खः । कोरोना भाइरस संक्रमणया कारणं यानाः अन्तर्राष्ट्रिय बजारय् लुँया भाः थहां वंगु खँ सुनचाँदी व्यवसायी महासंघया पुलांम्ह अध्यक्ष लिसें विश्लेषक तेजरत्न शाक्यं कनादीगु दु ।

वय्कलं कोरोनाया प्रभावया कारणं छखे बैंकं बीगु ब्याजदर म्हो जुया वनाच्वंगु दुसा मेखे उत्पादन म्होजुयाः नं लुँया भाः थहां वंगु खँ कनादी । वय्कःया कथं विश्व बजारय् रोजगारी म्हो जुया वनाच्वंगुलिं यानाः नं लुँया भाः थहां वनेत तिबः जुयाच्वंगु खः । लुँयागु भाः थहां वंगुलिं बजारय् लुँवहः व्यवसायीतय् ज्या धाःसा ठप्प जूगु दु। भाः थहां वंगुलिं लुँ न्याः वइपिं म्हो जूगु जक मखु लुँयागु तिसा दयेकः वइपिं तकं म्हो जुया वंगु कारणं तिसाया ज्या ठप्प जूगु दु। लुँया तिसा दयेकेगु ज्या ठप्प जूगुलिं लुँवहः व्यवसाय याइपिंत तसकं थाकुयाच्वंगु खँ नं व्यवसायीतय्सं धाःगु दु ।

थौंकन्हय् कोरोना महामारीया कारणं अथें नं कारोवार मजुयाच्वंगु इलय् लुँया भाः थहां वनाः छुं भचा सम्भावना दुगु कारोवार नं शून्य व्यवसायीतय्त तसकं थाकुयाच्वंगु खँ धाःगु दु। ‘आः बाः पुलेगु व स्टाफ लहीत तकं व्यवसायीयात थाकुयाच्वंगु दु’ सुनचाँदी व्यवसायी संघया पुलांम्ह नायः तेजरत्न शाक्यं कनादिल । वय्कःया कथं आः लकडाउन शून्य मजूतले नेपालय् लुँया बजारं गति कायेफइगु सम्भावना मदु ।

विश्व बजारय् कोरोनाया कारणं वःगु तःधंगु सुस्तता व उकिसनं चीन-अमेरिका तनावं यानाः मनूतय्सं लुँपाखे लगानी अप्वयेका हःगुलिं नं लुँया भाः थहां वंगु खः । लुँयागु भाः तोलां छगू लाख पुलेधुंकाः नं थहां वनेगु क्रम धाःसा दिउगु मदुनि ।

लुँ व्यवसायया विश्लेषक शाक्यं कनादी, ‘आः वइगु डिसेम्बर तक लुँयागु भाः कुहां वइगु सम्भावना मदु। थुकिं यानाः देशय् लुँयागु कारोवार बढे जुइगु सम्भावना नं मदु।’