लकडाउन तयेत प्रम सहमत !

स्वास्थ्यविद्तय्गु सुझाव बारे मन्त्रिपरिषद्य् सहलह याइगु

येँ (नेपालभाषा टाइम्स) – स्वनिगलय् कोरोना संक्रमण धमाधम अप्वया वनेवं हाकनं ‘लकडाउन’ तयेगु लागिं सरकार सहमत जूगु दु । प्रधानमन्त्री केपी शर्मा ओलीं म्हिगः विज्ञतय्त सःताः यानादीगु सहलहया झ्वलय् विज्ञतय्सं स्वनिगः लिसें देयया छुं छुं थासय् स्थिति स्यनावंगु धासें लकडाउन यायेत सिफारिस याःगु खः ।

म्हिगः जूगु सहलहया झ्वलय् विज्ञतय्सं सरकारं थःपिंके मन्यँसे लकडाउन खुल्ला याःगु, स्वास्थ्य सुरक्षाया गुगुं नं कथंया मापदण्ड नाला मकाःगुलिं चरम लापर्वाही जूगु धासें स्वनिगः लिसे प्रभावित जिल्लाय् हानं लकडाउन यायेमाःगु सुझाव बिउगु खँ सीदुगु दु । सरकारं वंगु चैत ११ गतेनिसें लकडाउन लागू याःगु खःसा वंगु साउन ६ गते लकडाउन अन्त्य याःगु खः । तर लकडाउन अन्त्य यायेवं स्वनिगः लगायत मधेसया आपालं जिल्लाय् संक्रमणया ल्याः अप्वया वनेवं सरकारं हाकनं लकडाउन यायेगु तयारी याःगु खँ धाःगु दु ।

सूत्रया कथं आः च्वनीगु मन्त्रिपरिषद्या बैठकय् लकडाउन सम्बन्धी प्रस्ताव वइगु सम्भावना दु । प्रधानमन्त्री ओली लकडाउन खुल्ला यायेत न्हापा नं तयार जुयामदीगु खःसां लिपा खुल्ला याःगु खः ।

निवाः लकडाउन तयेत सुझाव
जनस्वास्थ्य विज्ञतय्सं आः येँय् म्होतिं नं निवाः लकडाउन यायेमाःगु सुझाव बिउगु खँ सीदुगु दु। म्हिगः प्रधानमन्त्री केपी ओलीं यानादीगु सहलहज्याझ्वलय् जनस्वास्थ्यविज्ञतय्सं थ्व सुझाव बिउगु खः । उमिसं माल धाःसा लकडाउन जक मखु कर्फ्यू हे तयेमाःसां तयेमाः धकाः नं सुझाव बिउगु खँ सीदुगु दु ।

समुदायस्तरय् छम्ह मनूपाखें मेम्ह मनूयाके संक्रमण न्यनावनीगु दर अप्वःगुलिं झिंन्यान्हु तक कडा लकडाउन यायेत उमिसं प्रमयात सुझाव बिउगु खः । थुकी प्रम ओली सकारात्मक जुयादीगु खँ धाःगु दु ।

येँय् जक छन्हुं ४८ म्ह
येँ (नेपालभाषा टाइम्स) – म्हिगः छन्हुं येँय् ४८ म्ह कोरोना संक्रमित लूगु दु। उकथं हे ख्वपय् झिंस्वम्ह व यलय् छम्ह संक्रमित लूगु दु। राष्ट्रिय जनस्वास्थ्य प्रयोगशाला टेकुइ याःगु परीक्षणय् ख्वपया ११ व येँया ३८ म्हेसित कोरोना संक्रमण पुष्टि जूगु खः । उकथं हे त्रिवि शिक्षण अस्पताल महाराजगञ्जय् याःगु परीक्षणय् येँया न्याम्हेसित संक्रमण पुष्टि जूगु खःसा नेपाल प्रहरी अस्पतालय् याःगु परीक्षणय् ख्वपया छम्हेसित संक्रमण पुष्टि जूगु खः ।

अथे हे स्टार अस्पताल सानेपाय् याःगु परीक्षणय् येँया निम्ह व यलया छम्हेसित संक्रमण पुष्टि जूगु लुइकूगु खः । बीआईडीएच ल्याबलया परीक्षणय् येँया स्वम्हेसित संक्रमण पुष्टि जूगु खःसा नेपाल कोरिया मैत्री अस्पतालय् याःगु परीक्षणय् ख्वपया छम्हेसित संक्रमण पुष्टि जूगु दु ।