मदुम्ह लक्ष्मीदास मानन्धरया थौं अन्त्येष्टि

येँ (नेपालभाषा टाइम्स) – मदुम्ह उद्योगपति लिसें भाषासेवी लक्ष्मीदास मानन्धरया अन्त्येष्टि शुक्रवाः याइगु जूगु दु । थौं न्हिनय् ११.३० बजे थनया लुतिइ वय्कःया अन्त्येष्टिया तयारी जुयाच्वंगु खँ थँहिति त्वाः नं दुथ्याःगु वडा नं. १७ या अध्यक्ष नविन मानन्धरं कनादीगु दु ।

९४ दँ दुम्ह भाजु मानन्धर म्हिगः थनया ह्याम्स अस्पतालय् वासः याकु याकुं मदुगु खः । वय्कःया सीम्हयात थौं हे अस्पतालं लुतिइ हइगु खँ सीदुगु दु ।

छुं न्हि न्ह्यवंनिसें कोरोना पोजिटिभ जुयाः छेँय् हे च्वंच्वनादीम्ह वय्कःयात म्हिगः आकाझाकां हृदयाघात जुयाः अस्पताल यंकेमाःगु खँ नं वडा अध्यक्ष नविन मानन्धरं कनादिल । म्हिगः सुथय् तक नं वय्कः साल्ट ट्रेडिङया पदाधिकारीतलिसे भर्चुयल मिटिङय् च्वंच्वनादीगु खः । न्हिनय्हृ दयाघात जुयाः निक्वः स्वक्वः बान्ता नं जूगुलिं वय्कःयात अस्पताल यंकूगु खःसा बहनी अस्पताय् हे वय्कः मदुगु खः ।

पेशागत रुपं उद्योग व्यवसायी खःसां नं भाजु मानन्धरं शिक्षा, भाषा, साहित्य, बुद्ध धर्म, समाजसेवा, जातीय संगठन आदि आपालं ख्यलय् यक्व योगदान यानादीगु दु । वय्कः मदुगु दुःखय् थीथी संघ संस्थातय्सं शोक प्वंकुसें छेँजःयात बिचाः हायेकूगु दु ।