पासा पुचः बेल्जियमं सिद्धिदास बुन्हि हन

येँ(नेपालभाषा टाइम्स÷युरोपेली देय् बेल्जियमय् च्वनाच्वंपिं नेवाःतय्सं नं नेपालभाषाया प्यंगःथांमध्ये छगः महाकवि सिद्धिदास महाजुया बुन्हि हंगु दु । पासा पुचः बेल्जियमं भर्चुअल माध्यमं ज्याझ्वः महाकवि सिद्धिदास महाजुयात लुमंकूगु खः ।

पुचःया ग्वसालय् नायः सुरेन्द्रमान अमात्यया सभापतित्वय् जूगु महाकवि सिद्धिदासया १५५ क्वःगु बुन्हि हनाज्याझ्वःया उलेज्या मूपाहां जनकवि दुर्गालाल श्रेष्ठं त्वाःदेवाय् मत च्याकाः यानादीगु खः । ज्याझ्वलय् नवासें जनकवि श्रेष्ठं विदेशय् च्वनाः नं नेपाः देय् दयेकाच्वंपिं कवि÷साहित्यकारपिंसं यानाच्वनादीगु ज्या सुथां लायेमा धकाः सुवाः बियादीगु खः ।

अमेरिकाया शिकागोय् च्वनादीम्ह साहित्यकार केशरमान ताम्राकारं निब्वय् थलाः न्ह्याकादीगु ज्याझ्वलय् बेलायतय् च्वनादीम्ह कवि ज्ञानीशोभा तुलाधरं लसकुस यानादीगु खः ।

लोककवि राजभाई जकःमिं सिद्धिदास महाजुया लुमन्तिइ च्वयादीगु म्येँ हाला न्ह्याःगु ज्याझ्वलय् छत्रबहादुर कायस्थ, प्रा. डा. सुन्दरकृष्ण जोशी, लोककवि जकःमि, वल्र्ड नेवाः अर्गनाइजेसनया न्वकुलिसें पासा पुचः बेल्जियमया सल्लाहकार रजनी प्रधान, प्रा. डा. निर्मलमान तुलाधरं सिद्धिदास महाजुया थीथी पक्षयात कयाः नुगःखँ तयादीगु खः । सिद्धिदासया लुमन्तिइ च्वयातःगु ब्याहांचुलि लसय् जागरण म्येँ न्यंकेगु नापनापं युगकवि सिद्धिचरण श्रेष्ठं सिद्धिदासयात कयाः च्वयादीगु चिनाखँ नं ब्वनाः न्यंकूगु खः ।

पुचःया नायः सुरेन्द्रमानजुं ने.सं. ११३० निसें ११३२ तक महाकवि सिद्धिदासया बुन्हि हनेगु ज्याझ्वः जूगु व वयां लिपा दिनाच्वंगु ज्याझ्वः थुगुसी हाकनं हनेगु ज्या जूगु जानकारी बियादिसें आवंलि दँय्दसं सिद्धिदास बुन्हि हनाज्याझ्वः न्ह्याका वनेगु प्रतिवद्धता नं प्वंकादिल । लिसें वय्कलं महाकवि सिद्धिदासया ‘सज्जन हृदयाभरण’ खस नेपाली भासं भाय् हिलाः पिथनागु व आः याकनं हे ‘सिद्धि रामायण’ नं पूवंक पिथनेगु बचं बियादीगु खः ।

ज्याझ्वलय् विश्वया थीथी झिंन्यागू देय्या ४४ म्ह कवि, साहित्यकारलिसें साहित्यह्यमिपिंसं ब्वति कयादीगु खः ।