केपी ओलीं धापू लित मकाःसा मगःतय् तःधंगु आन्दोलन
येँ- पुलांम्ह प्रधानमन्त्री लिसें नेकपा (एमाले) या अध्यक्ष केपी शर्मा ओलीं न्हापांम्ह सहिद लखन थापाया बारे बियादीगु अभिव्यक्तियात कयाः देय्या मगः समुदायं अझ कडा आन्दोलन न्ह्याकीगु सम्भावना अप्वया वंगु दु ।
म्हीग बुटवलय् ओलीयात थःगु धापू लित का धइगु माग यासें मगर युवा संघं ओलीया पुत्ला च्याकूगु खःसा म्हिगः लखन थापा मगर स्मृति प्रतिष्ठान रुपन्देहीपाखें नं केपी ओलीयात थःगु धापू लित कायेत माग याःगु दु । प्रतिष्ठानं म्हिगः बुटवलय् छगू पत्रकार सम्मेलन यासें एमाले अध्यक्ष ओलीया धापू आपत्तिजनक जूगु कारणं वयक्लं थःगु धापू लित कायेमाःगु माग याःगु खः ।
प्रतिष्ठानया अध्यक्ष माधवरसिंह सलामी मगरं नेपाल सरकारं वि.सं. २०७२ सालय् हे तथ्य प्रमाणया लिधंसाय् लखन थापायात नेपाःया न्हापांम्ह सहिद खः धकाः घोषणा यायेधुंकाः आः प्रधानमन्त्री थेंज्याःगु पदय् च्वनेधुंकूम्ह मनुखं उकिया अःखः प्रतिक्रिया बीगु पाय्छि मखु धयादीगु दु । सरकारं लखन थापाया किपा तयाः हुलाक टिकट पिकायेगु, पाठ्यसफुतिइ दुथ्याकेगु व सामान्य ज्ञानय् समेत तयाः मान्यता बीधुंकूगु अवस्थाय् छुं प्रमाण मदयेक मेम्ह मनूयात न्हापांम्ह सहिद धायेगु धइगु नेपाःया मगः समुदायया अपमान यायेगु सरह खः धकाः नं विरोध याःगु दु ।
एमाले अध्यक्ष ओलीं अनेरास्ववियुया छगू ज्याझ्वलय् न्ववासें नेपाःया न्हापांम्ह सहिद लखन थापा मखुसें अछामया बाकावीर शाह खः धकाः न्ववानादीगु खः । मगः समुदायं बाकावीर न्हापांम्ह सहिद खः धइगु प्रमाण पेश यायेत हाथ्या बिउगु दु । जंग बहादुर कुँवरं दरवारयात थःगु कब्जाय् कयाः तत्कालीन शाह जुजुपिंत नां जकया जुजु दयेकाः शासन थःगु ल्हातय् कायेवं वहे शाह जुजुपिनि छम्ह सन्तान बाकाबीरं थःपिनि गुमे जूगु सत्ता लित कायेगु लागिं जंगबहादुर विरुद्ध विद्रोह याःगु व वहे इलय् जंगबहादुरं खटे याःपिं निम्ह गुप्तचरतय्सं बाकावीरयात षडयन्त्रपूर्वक स्याना बिल धइगु इतिहास दु ।
मगर जातिलिसे सम्बन्धित थीथी खलः पुचःतय्सं ओलीयात थ्व धापू लित कायेत इनाप यासें थुकिया विरुद्ध सकलें मगःत छप्पँ जुयाः आन्दोलन याये माली धकाः नं ख्याच्वः बिउगु दु ।
LEAVE YOUR COMMENTS