किपुलिइ पार्क दयेकेत सहलह

किपू (नेपालभाषा टाइम्स) – किपू नगरपालिका वडा नं. ३य् दयेकेत्यंगु पार्कयात कयाः सहलह जुल । किपू नपा वडा नं. ३ स्थित दीखु धइगु थासय् दयेकेत्यंगु न्हूगु पार्कया अवधारणायात कयाः सहलह याःगु खः ।

किपू नगरपालिकाया प्रमुख रमेश महर्जनया उपस्थितिइ जूगु सहलहया इलय् पार्क दयेकेत छु गज्याःगु दयेकेमाः व छु छु वस्तुयात ध्यान बीमाः धइगु खँय् सहलह जूगु खः । किपू नपा वडा नं. २ या देवध्वाखायात नं कःघानाः दयेकेत्यंगुपार्कया डिजाइन नं प्रस्तुत याःगु खः । आः पार्क दयेकेगु धाःगु थासय् जनआन्दोलनया इलय् किपुलिइ शहादत प्राप्त याःपिं प्यम्ह सहीदया लुमन्तिइ ‘राराहिल शान्ति पार्क’ दयेकेगु उद्देश्यं शहीद स्तम्भ नं तयातःगु दु। बैठकय् राराहिल शान्ति पार्क दयेके फत धाःसा किपूया आर्थिक विकासय् नं तिबः जुइगु जूगुलिं थ्व सम्बन्धय् थप सहलह यायेमाःगु आवश्यक जूगु बैठकय् सहभागितय्सं धाःगु दु ।

सहलहया इलय् किपू नगरपालिका वडा नं २ या वडाअध्यक्ष रमेशमान डंगोल व ३ वडाअध्यक्ष राजेन्द्र महर्जन लगायतया जनप्रतिनिधितय्गु उपस्थिति दुगु खः ।