एसईई रिजल्ट झन् हे भद्रगोल
येँ – वंगु शनिवाः प्रकाशित जूगु एसईई रिजल्टय् नेपालभाषा ऐच्छिक विषय कयाः ब्वंपिं विद्यार्थीतय्गु परीक्षाफल पिहां मवःगु खःसा आः मेमेगु ऐच्छिक विषय कयाः ब्वंपिं विद्यार्थीतय्गु परीक्षाफल नं पिहां मवःगु खँ सीदुगु दु । परीक्षा निणन्त्रण कार्यालयं हथासं रिजल्ट घोषणा
यायेगु झ्वलय् चरम लापर्वाही याःगुलिं थथे जूगु खँ सीदुगु दु ।
परीक्षा नियन्त्रण कार्यालयं झिगू विद्यालयया परीक्षाफल हे प्रकाशित मयाःगु खँ नं सीदुगु दु । थःपिनिगु विद्यार्थीया लिच्वः तकं पिहां मवःगुलिं येँया झिगू विद्यालयं परीक्षा नियन्त्रण कार्यालयय् उजुरी समेत दर्ता याःगु दु ।
कार्यालयया सूचना अधिकारी बिष्णुप्रसाद मिश्रं झिगू विद्यालयं थःगु विद्यालयया परीक्षाफल प्रकाशित मजू धासें उजुरी दर्ता याःगु खँ कनादीगु दु । गुलिखे विद्यार्थीया प्राक्टिकल नम्बर तकं सफ्टवेयर इन्ट्री छुटे याःगुलिं आपालं विद्यार्थीया परीक्षाफल हे गायब याःगु द्वपं तकं थीथी विद्यालयं बिउगु दु ।
नतिजा सार्वजनिक जूगु नीप्यघौ दुने झिगू विद्यालयं नतिजा मवः धासें निवेदन बिउगु खः । म्हिगः सोमवाः नं थःपिनिगु विद्यालयया नतिजा मवः धासें थीथी विद्यालयया शिक्षकत निवेदन बीत लाइनय् च्वनेमाःगु अवस्था वःगु खः । आः तक झिगू विद्यालयं जक निवेदन बिउगु धाःसां म्हिगः तक अझ अप्वः विद्यालयया निवेदन दर्ता जूगु खँ शिक्षकतय्सं धाःगु दु ।
येँया स्युचाटारय् च्वंगु रेडियन पब्लिक बोर्डिङ स्कूलपाखें स्वीनिम्ह विद्यार्थीं एसईई परीक्षा बिउगु खःसा सुयागुं नं पूर्ण लिच्वः मवःनिगु खँ धाःगु दु । उगु स्कूलया जनसंख्या प्राक्टिकल व थ्यौरी (लिखित व प्रयोगात्मक) निगुलिं परीक्षाफल प्रकाशित मजूनि ।
अथेहे ऐच्छिक गणितय् नीस्वम्ह विद्यार्थीं परीक्षा बिउगु खःसा उमिगु नं परीक्षाफल पिहां मवःनि । ऐच्छिक वातावरणया परीक्षा बिउपिनिगु
परीक्षाफल धाःसा पिहां वःगु दु । कम्प्युटर साइन्सय् फुक्कं विद्यार्थीया प्राक्टिकल अंक वःसां प्रयोगात्मक अंक धाःसा पिहां मवःनि ।
रेडियन स्कूलया प्रिन्सिपल सूर्यबहादुर केसीं ‘नेपालभाषा टाइम्स’ यात धयादिल, ‘म्हिगः परीक्षा नियन्त्रण कार्यालयय् विद्यार्थीं नेटं पिकाःगु मार्कसिट व विद्यालयया निवेदन बियागु दु ।’
म्हिगः हे जगत सुन्दर ब्वनेकुथिया खुम्ह विद्यार्थीं नं थःपिनिगु ऐच्छिक नेपालभाषाया परीक्षाफल पिहां मवः धासें स्कुलया निवेदन सहित उजुरी दर्ता याःगु दु । जगतसुन्दरया विद्यार्थीतय्त आः छवाःया दुने रिजल्ट वइ धकाः परीक्षा नियन्त्रण कार्यालयं जानकारी बिउगु खँ सीदुगु दु । कार्यालयया गोप्य शाखाया उपसचिव डिल्ली लुइँटेलं प्यन्हुया दुने अंक भिंकाः रिजल्ट वइगु खँ कनादीगु दु ।
मेखे नम्बर भिंकाः हानं न्हून्हूगु रिजल्ट पिकया हःगुलिं गुलिखे स्कूलय् स्कूल टप जुल धाःपिं विद्यार्थीत लिउने लानाः मेपिं न्ह्यःने लाःवःगु दुसा नम्बर कम वल धकाः निराश जूपिं गुलिखे विद्यार्थीतय्गु नम्बर धाःसा हानं ग्रेड थपे जुया पिहां वःगु दु ।
थ्व भद्रगोल बारे परीक्षा नियन्त्रण कार्यालयं छानबिन नं याइगु जूगु दु ।
LEAVE YOUR COMMENTS