ज्याथपिं नागरिकतय्त यँ मनपां बिया वयाच्वंगु उपचार सेवा स्थगित

येँ– येँ महानगरपालिकां ज्याथपिं नागरिकतय्त बिया वयाच्वंगु स्वास्थ्य उपचार सेवा स्थगित जूगु दु । येँ मनपाया मेयरय् विद्या सुन्दर शाक्य त्याना वयेधुंकाः खुला न्ह्यः ८८ दँ दयेधुंकूपिं ज्याथपिंत छेँय् छेँय् वनाः स्वास्थ्य उपचार सेवा बिया वयाच्वंगु खः ।

वंगु असार १६ गते सुरु जूगु थ्व सेवा आः चिकित्सक व नर्स मदुगुलिं स्थगित जूगु खँ येँ मनपाया जनस्वास्थ्य विभागं धाःगु दु । थ्व सेवाया निंतिं जिल्ला जनस्वास्थ्य कार्यालयं न्हापांगु चरणय् झिम्ह झिम्ह चिकित्सक नर्स खटे यानातःगु खः । अस्थायी रुपं जक खटे यानातःगुलिं उपिं स्वास्थ्यकःमित हाकनं जिल्ला जनस्वास्थ्य महाशाखाय् हे लिहां वंगु दु ।

मनपां आः न्हूपिं चिकित्सक व नर्सया व्यवस्था यानाः थ्व सेवा हाकनं न्ह्याकेगु खँ धाःगु दु । येँ मनपाया ३२ वडाय् थौंकन्हय् ८८ दँ पुलेधुंकूपिं ५९६ म्ह ज्याथपिं नागरिक च्वनाच्वंगु दु । मनपां उमित दँय् झिंनिद्वः झिंनिद्वः तका भत्ता बीगु नं सुरु यायेधुंकूगु दु ।