वडाया आइसलोसेनयात चाइना फाउन्डेसनया ग्वाहालि

येँ – येँ महानगरपालिका १७ वडा कार्यालयं क्षेत्रपाटीइ संचालन यानाच्वंगु आइसोलेसनया निंतिं छगू चिनियाँ संस्थां अक्सिजन सिलिण्डरलगायत स्वास्थ्य सामग्री ग्वाहालि बिउगु दु । चाइना फाउन्डेसन फर पभर्टी एलेभिएसनं आइसोलेसनया निंतिं २० गः अक्सिजन सिलिण्डरया लिसें थीथीे स्वास्थ्य सामग्री लःल्हाःगु खः ।

आइसोलेसन परिसरय् हे सोमवाः ग्वसाः ग्वःगु ज्याझ्वलय् उगु सामाग्री लःल्हाःगु खः । फाउन्डेसनका कन्ट्रि डाइरेक्टर झाउ छि याङं १७ वडाया वडाध्यक्ष नवीन मानन्धरयात सामान लःल्हानादीगु खः । फाउन्डेसनं छगः सिलिण्डरय् ४० लिटर अक्सिजन क्षमताया २० गः अक्सिजन सिलिण्डर निसःपाः पिपिई, सछिगू फेसशिल्ड, द्वःछिगू मास्क र निगः निसंक्रमण मेशीन ग्वाहालि कथं बिउगु खः ।
सामग्री लःल्हाना कयादिसें वडाध्यक्ष मानन्धरं देश महामारी वयाच्वंगु अवस्थाय् चाइना फाउन्डेसनया थ्व ग्वाहालिं थःपिंत तःधंगु हःपाः चूलाःगु खँ धयादिल ।

अथेहे फाउन्डेसनया नेपाल निर्देशक झाउ छि याङं नेपालय् कोभिडया निगूगु लहर वःगुलिं थःपिंत नं चिन्तित याःगु दु धासें महमारी नियन्त्रण यायेत चिधंगु ग्वाहालिया कुतः यानागु खँ धयादिल ।

फाउन्डेसनं सोमवाः हे काठमाडौं महानगरपालिका वडा नम्बर १९ र वडा नम्बर २६ या आइसोलेसनया लागि नं अक्सिजन सिलिण्डरलिसें थीथी स्वास्थ्य सामग्री लःल्हाःगु खः ।

फाउन्डेसनं थ्वयां न्ह्यव नं येँया थीथी थासय् ल्हाः सिलेगु ट्यांकि स्थापना यायेगु निसें गरिब परिवारया विद्यार्थीतय्त खाद्यान्न सहयोग याये धुंकूगु दु ।

सम्बन्धित बुखँ

LEAVE YOUR COMMENTS