किपुलिइ दाफा धुकू पासा ज्याझ्वः

किपू (नेपालभाषा टाइम्स)- किपुलिं वंगु छुं दिं न्ह्यः दाफा बाजंया संगीतप्रेमी ल्याय्म्ह पुस्तायात ध्यानय् तयाः छगू ज्याझ्वः जुल । झीगु सांगीतिक सम्पदाया पुनःकल्पना यायेगु उद्देश्यं थनया जात्रा रेष्टुरेन्टय् दाफा धुकू व दाफा पासा ज्याझ्वः जूगु खः ।

किपू नगरपालिकाया प्रमुख राजकुमार नकःमिं उलेज्या यानादीगु ज्याझ्वः दाफा संगीत संरक्षण व प्रर्वद्धनया निंतिं न्ह्यचिला च्वनादीम्ह पुष्पा पलाञ्चोकेया गणेद्यः ग्वारा दाफा म्येँपाखें ज्याझ्वः न्ह्याःगु खः । उगु इलय् वय्कःयात लकस महर्जन, न्हूजः महर्जन, रोशन महर्जन लगायतं दाफा बाजनय् ग्वाहालि यानादीगु खः ।

दाफा धुकू पासाया छ्याञ्जे दिलिप महर्जनं लसकुस यासें लिच्छवी शिलालेखकथं झिंन्यासः दँ पुलांगु दाफा संगीतयात गुकथं न्ह्यःने यंके फइ व थौंया ल्याय्म्ह पुस्तायात दाफा बाजंप्रति गुकथं आकर्षित याये फइ धइगु बारे थःगु धारणा तयादीगु खः ।

नगर प्रमुख नकःमिं दाफा संस्कृतिलिसे सम्बन्धित ब्वज्याया नं उलेज्या यासें दाफा संस्कृतियात हाकनं जीवन्त यायेत दाफा धुकू पासाया कुतः च्वछायेबहजू धासें थुकथंया संस्कृतियात जीवन्त याना तयेत न्हू पुस्तायात नं थज्याःगु संस्कृति पुस्तान्तरण याना यंकेमाःगु खँय् बः बियादिल ।

वरिष्ठ वाद्यवादक न्हुछेबहादुर डंगोलं गुरुया शिक्षा मदयेकं सुनानं छुं याये फइमखुगु जक मखु याःसां सफल जुइमखु धासें किपू देय् कला संगीतया मिब्वाला वःगु थाय् खः धयादिल ।

नगर उपप्रमुख शुभलक्ष्मी शाक्य (सुनितां) नुगःखँ तयादीगु ज्याझ्वलय् नगर दुनेया दाफा गुरुपिंत नेवाः परम्पराकथं ख्येँ सगं बियाः बेतालिं चिकाः दोसल्ला न्ययेकाः हनेज्या नं याःगु खः ।

संस्थाया अध्यक्ष रुपेन्द्र महर्जनया सभाध्यक्षताय् न्ह्याःगु ज्याझ्वलय् ६ वडाअध्यक्ष दिवाकर अधिकारी, १० वडाअध्यक्ष नरेश महर्जन, किपू पर्यटन विकास समितिया नायः विकास महर्जन लगायतया उपस्थिति दुगु खः ।