निगुलिं गुटया तानातानय् देउवा

येँ – प्रम केपी ओलीं विघटन याःगु संसदयात सर्वोच्च अदालतं पुनस्र्थापना यात धाःसा उगु संसदपाखें नेपाली कांग्रेसया सभापति शेरबहादुर देउवायात प्रधानमन्त्री चयन यायेगु लागिं थःपिं तयार दुगु खँ नेकपा नेपाल–दाहाल गुटया नेता पुष्पकमल दाहालं कनादीगु दु ।

म्हिगः सुथय् छगू टेलिभिजन अन्तर्वार्ताय् न्ववासें नेता दाहालं पुनस्र्थापित संसदय् शेरबहादुर देउवायात प्रधानमन्त्रीया रूपय् स्वीकार यायेत थःपिं तयार दुगु खँ स्पष्ट यानादीगु खः । वय्कलं देउवा वा देउवां सिफारिस याःम्ह सुयातं नं प्रधानमन्त्री दयेकेत थःपिं तयार दुगु खँ कनादीगु खः ।

कांग्रेस सभापति देउवायात थज्याःगु हे प्रस्ताव प्रधानमन्त्री केपी ओलीं नं बियातःगु खँ सीदुगु दु । छुं जुयाः संसद पुनस्र्थापना जुल धाःसा देउवायात प्रधानमन्त्रीया लागिं समर्थन यायेगु प्रस्ताव ओलीं बियातःगु कारणं देउवां विघटनया पक्षय् बिचाः तयेगु याना हःगु खँ धायेगु यानाहःगु दु ।

आः संसद पुनस्र्थापना जुल धाःसा नेपाल कम्युनिष्ट पार्टी विभाजित जुइ–धुंकीगु कारणं अन मेम्ह हे प्रधानमन्त्रीं सरकार गठन यायेमाःगु आवश्यक जुइ । नेपाल–दाहाल गुटं जसपालिसे जानाः सरकार गठन यायेगु बिचाः याःगु खःसां बहुमत मखाइगु जूगुलिं आः कांग्रेसलिसे सहकार्यया प्रस्ताव न्ह्यःने यंकूगु खः ।

मेखे प्रम ओलीं धाःसा संसद भंग जुयाः चुनावय् वन धाःसा कांग्रेसयात यक्व फाइदा जुइगु व संसद पुनस्र्थापना जुल धाःसां देउवायात हे प्रधानमन्त्री दयेकेगु धकाः प्रस्ताव तयातःगुलिं नेपाली कांग्रेस थ्व इलय् ‘निपां ल्हातय् लड्डु’ या अवस्थाय् लानाच्वंगु खँ धाःगु दु । थ्व प्रस्तावय् देउवा धाःसा मौन जुयाच्वंगु दनि ।

सम्बन्धित बुखँ

LEAVE YOUR COMMENTS