‘कानुन कार्यान्वयनय् समर्थन दु’

येँ (नेपालभाषा टाइम्स)- येँ मनपाया मेयर बालेन साहं थौंकन्हय् यानाच्वंगु ज्याखँयात उपमेयर सुनिता डंगोलं ग्वाहालि मयाः धकाः छुं अनलाइन मिडियातय्सं यकःति ढंगं च्वयाहःगु समाचारयात कयाः उपमेयर डंगोलं आपत्ति क्यनादीगु दु । म्हिगः वय्कलं छगू विज्ञप्ति जारी यासें थः मनपाया उपमेयर जूगु कारणं येँ मनपापाखें कानुन कार्यान्वयनया लागिं याइगु हरेक ज्याखँय् थःगु साथ व समर्थन दइगु खँ वय्कलं स्पष्ट यानादीगु दु । थःगु बारे समाचार च्वयेबलय् पूवंक न्यनेकने यानाः जक च्वयेत नं वय्कलं इनाप यानादीगु दु ।

वंगु छुं ई न्ह्यवंनिसें छुं अनलाइन पोर्टल लगायत सामाजिक सञ्जालय् सक्रिय छुं मनूतय्सं उपमेयर डंगोल विरुद्ध सुनियोजित रुपं समाचार प्रशारणया नापनापं टिकाटिप्पणी याना हयाच्वंगु दु । उमिसं डंगोलयात मेयरया लिउ लिउ छाय् मवना, मेयरयात समर्थन मयाना धइगु न्ह्यसः तयाः अनावश्यक टिप्पणी याना हयाच्वंगु खनेदु ।