ख्वप नपाया बजेट सर्वसम्मत

ख्वप (नेपालभाषा टाइम्स)- ख्वप नगरपालिकाया १४क्वःगु नगरसभाया बैठकं आर्थिक दँ ०८०÷८१या बजेट सर्वसम्मतं पारित याःगु दु । ख्वप नगरपालिकाया प्रमुख सुनिल प्रजापतिया अध्यक्षताय् च्वंगु बैठकं आर्थिक विधेयक २०८०, विनियोजन विधेयकलिसें आ.व. ०८०÷८१ या निंतिं पेश याःगु बजेट सर्वसम्मतं पारित याःगु खः ।

नगर उपप्रमुख रजनी जोशीं वंगु असार १० गते च्वंगु नगरसभाया बैठकय् वइगु आर्थिक दँया निंतिं निगू अर्ब नीखुगू करोड चय्न्यागू लख ग्वीप्यद्वःया बजेट न्ह्यब्वयादीगु खः । बजेटयात कयाः जूगु सहलहय् ब्वति कयाः आवश्यक सल्लाह, सुझावलिसें जिज्ञासा व समर्थन यानाः बजेट पारित यायेत ग्वाहालि यानादीगुलिं सभाध्यक्ष प्रजापतिं नगर सभाया दुजःपिंत सुभाय् नं देछानादीगु दु ।

बैठकय् नगर प्रमुख प्रजापतिं ताःई न्ह्यःनिसें कुतः जुयाच्वंगु ख्वप विश्वविद्यालय स्थापनाया योजना संसदपाखें पारित याकेत नगरपालिकां जोड बियावयाच्वंगु जानकारी बियादिसें थुकिया निंतिं कुतः निरन्तर न्ह्यानाच्वनी धयादिल ।

बजेटयात कयाः सभासदपिंसं तयादीगु न्ह्यसः व जिज्ञासा लिसः बियादिसें नगर उपप्रमुख जोशीं नगरया दक्वं वडाय् शिशु स्याहार केन्द्र स्थापना व संचालन यायेगु व उकिया निंतिं अध्ययन जुयाच्वंगु दु धयादिल । अथे हे कृषि विकासया निंतिं कृषकया सूचीकरण यायेगु, करया दायरा समयसापेक्ष तचाः याना यंकेगु, संस्थागत क्षमता विकासया निंतिं आवश्यक व्यवस्था यानागु व शान्ति सुरक्षाया निंतिं नगरया थीथी थाय् सीसी क्यामरा जडान व सतक मतया व्यवस्था यायेगु ज्या जुयाच्वंगु जानकारी बियादिल ।

बैठकं नगरपालिकाया सिँ, अप्पा, आँय्पा, खरिद अनुदान कार्यविधि २०७५या संशोधन प्रस्ताव व ख्वप नपाया लेखा समितिया प्रतिवेदन २०८० नं पारित याःगु खः।