बिहिवाःतक खुसिबाः व चलःया खतरा

येँ (नेपालभाषा टाइम्स) – आइतवाः निसें मदिक्क वयाच्वंगु वां यानाः देय्न्यंकं न्हियान्हिथं खुसिबाः व चलः वयाच्वंगु दु। वइगु बिहिवाः तक थथे हे खुसिबाः व चलः वइगु खतरा दनिगु खँ धाःगु दु ।

जल तथा मौसम विज्ञान विभागया बाढी पूर्वानुमान महाशाखां म्हिगः हे छगू बुलेटिन जारी यासें बिहिवाः तक तःधंगु, चिंधंगु खुसिइ बहाव अप्वयेफुगु व थुकिं यानाः थीथी थाय् डुबानय् लाइगु व चलः वनीगु खतरा दनिगु खँ धाःगु खः ।

महाशाखां बिहिवाः तकं प्रदेश नं. २ व बागमती प्रदेशया चिचिधंगु खुसिइ नं बहाव अप्वया खतराया तह लिक्क थ्यनीगु खँ धाःगु दु। बिहिवाः कन्काई, कमला, बागमति व थ्वया सहायक खुसिइ लःया बहाव अप्वइगु व सतर्कता नालेमाःगु खँ धयादीगु दु। पश्चिम राप्ती व बबईया सहायक खुसिइ धाःसा बहाव म्हो जुयाः सतर्कता स्वयां क्वय् कुहां वनीगु अनुमान महाशाखाया दु। अथेहे प्रदेश ५, कर्णाली, सुदुरपश्चिम प्रदेश जुयाः न्ह्याः वनीगु चिचिधंगु खुसिइ नं सतर्कताया तह तक थ्यनीगु सम्भावना म्हो जक दुगु खँ धाःगु दु ।

महाशाखाया कथं थौं नं प्रदेश १, २, बागमति व गण्डकी प्रदेशया खुसिइ बहाव अप्वइगु हे खनेदु। कोशी व नारायणीइ बहाव म्हो जुयावःसां सतर्कता तहया जःखः हे जुइगु महाशाखाया अनुमान दु। तर कन्काई, कमला, बागमति, तिनाउ, पश्चिम राप्ती, चिनाउया छुं खुसिइ धाःसा आकस्मिक रुप. बहाव अप्वया खुसिबाः वइगु खतरा दुगु खँ महाशाखां धाःगु दु ।

महाशाखां बिहिवाः तक चिचिधंगु खुसिइ तकं लः अप्वया खुसिबाः वयेफुगु व थुकिं यानाः जःखः लागा डुबानय् लायेफुगु व चलः वनीगु सम्भावना नं अप्वः दुगु धासें उच्चसतर्कता नालेमाःगु खँ धाःगु दु ।

‘पृथ्वी राजमार्ग तुरुन्त चायेकेफइमखु’
येँ (नेपालभाषा टाइम्स) – स्वनिगःयात पिने जिल्ला स्वाइगु मू राजमार्ग पृथ्वी राजमार्ग तुरुन्त चायेके मफइगु खँ धाःगु दु। सोमवाः व मंगलवाः वःगु खुसिबाः व चलखं पृथ्वी राजमार्गया थाय्थासय् ताँ त्वःधूगु व लँ अवरुद्ध जुयाच्वंगु दु। निरन्तर वा वयाच्वंगुलिं लँ चिइकेत व ताँ दयेकेत अझं ई काइगु खँ डिभिजन सडक कार्यालय भरतपुरं धाःगु दु। पृथ्वी राजमार्गया धादिब व चितवन सीमानाय्लाःगु मौवा खुसिया ताँ छखेपाखें जक ५ मिटर चुइकायंकूगु दु। थ्व ताँय् आःयात ग्याविन जालिइ ल्वहं जायेकाःसा लँ चले यायेगु तयारी यानाच्वंगु दु। तर थ्व ज्या यायेत नं खुसिइ लःया मात्रा म्हो जुइमानि । डिभिजन सतक कार्यालय भरतपुरया इन्जिनियरतय् कथं थनया खुसिइ लःया बहाव म्हो जुइधुंकाः ज्या न्ह्याकूसां लँ दयेकेत निन्हु ला बी हे तिनि ।

पृथ्वी राजमार्गया मुग्लिन नौबिसे खण्डय् जक निन्हुयंकं वःगु वां निसलं मल्याक तःधंगु चिधंगु चलः वनाच्वंगु दु। जोगिमाराय् मंगलवाः तःधंगु चलः वंगु दु। अथेहे नारायणगढ–मुग्लिन सतकखण्डया चार किलो धाःथाय् नं तःधंगु चलः वनाच्वंगु दु। तनहुँया प्रमुख जिल्ला अधिकारी बद्रीनाथ अधिकारीया कथं पृथ्वी राजमार्गय् लाःगु तनहुँ खण्डय् जक आँबुखैरानी ऐनापहरा, बिमलनगर, डुम्रे, नाहालाय् चलः वनाच्वंगु दु ।

स्वनिगःया थीथी थाय् डुबानय्
येँ (नेपालभाषा टाइम्स) – वंगु आइतवाः निसें निरन्तर रुपं वयाच्वंगु वां स्वनिगःया थीथी थाय् डुबानय् लाःगु दु। बागमति खुसि बाः वयाः यलया शंखमुल पार्क पूर्ण रुपय् डुबानय् लाःगु दुसा येँया ११ वडा त्रिपुरेश्वर वंशीघाट च्वंगु सुकुम्बासी बस्ती नं डुबानय् लाःगु दु ।

उकथं हे ख्वपया हनुमानघाट, थिमि आदि थाय् नं डुबानय् लाःगु दुसा गुलिखें छेँय् खुसिबाः दुहां वनाः आपालं नोक्सान जूगु दु। उकथं हे शंखरपुर नगरपालिका–२ सं चलः वयाः लामिछाने त्वाःया विष्णुप्रसाद लामिछाने, नवराज लामिछाने, रमेश लामिछाने, दंगाल त्वाःया यदुनाथ दंगाल, गणेश दंगाल, शिवप्रसाद दंगाल, कार्की त्वालय् सिताराम खड्का, गोविन्द कार्की, साधुराम लामिछाने छेँय् उच्च जोखिमय् लानाच्वंगु दु ।

अथे हे यलया इमाडोलय् च्वंगु किस्टअस्पतालय् खुसिबाः दुहां वयेवं अस्पतालया फुक्कं सेवा प्रभावित जूगु दु। ख्वपया हनुमन्ते खुसि व यलया कर्मनाशा खुसि सोमवाः बहनी अस्पतालय् दुहां वःगु खः । खुसिबाः वयाः अस्पतालं क्वय्या तल्ला दुबे जूगु खः । स्वनिगःया बागमति, विष्णुमति, हनुमन्ते खुसि, धोबी खोला, सुन्दरघाट लगायत आपालं खुसिइ खुसिबाः वःगु खः ।

टोखाय् चलखं निम्ह मस्त सित
येँ (नेपालभाषा टाइम्स) – येँया टोखा नगरपालिका–१ टाँसी डाँडाय् चलखं ल्हानाः निम्ह मस्त सीगु दु। म्हिगः सुथय् छेँय् पिने म्हिता च्वंगु इलय् आकाझाकां वःगु चलखं ल्हानाः स्वदँ दुपिं जुम्ल्याह सचिन व सन्धा रानामगर सीगु खँ महानगरीय प्रहरी वृत्त महाराजगञ्जं जानकारी बिउगु दु ।