जसपाया मन्त्रीत चीके फइ ला ?

येँ (नेपालभाषा टाइम्स)- सत्ता गठबन्धन त्वःताः एमालेलिसे चुनावी तालमेल याः वनेवं सरकारय् दुथ्याःपिं जसपाया फुक्क हे मन्त्रीतय्त बर्खास्त यायेगु तयारी याःगु खँ सीदुगु दु ।

जसपा एमालेपाखे लीवं आः उगु पार्टीयात सरकारय् तया तयेमाःगु आवश्यकता मदु धासें प्रधानमन्त्री शेर बहादुर देउवां म्हिगः सत्ता गठबन्धनया थीथी नेतातलिसे सहलह यानादीगु खः ।

प्रधानमन्त्री देउवां गठबन्धनया थीथी नेतातलिसे खँल्हाबल्हा यानादीसां थुकिया बारे आः तक जसपाया सुं नेतालिसे धाःसा खँ ल्हानादीगु मदुनि ।
वर्तमान मन्त्रिपरिषदय् जसपापाखें राजेन्द्र श्रेष्ठ, मृगेन्द्रकुमार सिंह, मोहम्मद इस्तियाक राई व प्रदीप यादव समेत यानाः प्यम्ह मन्त्री दुथ्यानाच्वंगु दु ।

जसपा लिसें सामान्य प्रशासन मन्त्री राजेन्द्र श्रेष्ठं धाःसा सरकारं यानाच्वंगु थ्व तयारीबारे थःपिंकेत छुं जानकारी मदुगु खँ धयादिल । ‘नेपालभाषा टाइम्स’ लिसे खँ ल्हासें वय्कलं धयादिल, ‘ग्व, जिं ला थुकिया बारे छुं हे न्यनागु मदुनि । जितः ला सरकारपाखें वा पार्टीपाखें आः तक छुं धाःगु नं मदुनि ।’ सरकारं मन्त्रीत चीकेत्यंगु खः ला धकाः बरु पार्टीया नेतातय्सं हे फोन यानाः वय्कःयाके न्यनाच्वंगु दु ।

मेखे जसपालिसे आवद्ध कानून– तय्सं धाःसा निर्वाचन आयोगं आचार संहिता लागू यायेधुंकूगु कारणं सरकारं आः मन्त्रीत थपे यायेगु वा लिकायेगु ज्या याये मदइगु खँ धायेगु याना हःगु दु ।

२०७८ सालय् तत्कालीन प्रधानमन्त्री केपी ओलीं चुनाव घोषणा लिपा थपे याःपिं मन्त्रीतय् पद सर्वोच्च अदालतं खारेज याना बिउगु खः । उगु खारेजी सम्बन्धी फैसलाय् चुनावया आचार संहिता लागू जुइधुंकाः मन्त्रीत थपे याये दइ मखु धकाः च्वयातःगुलिं बर्खास्त नं याये दइ मखु धकाः व्याख्या याये फइगु खँ धाःगु दु ।

गठबन्धनलिसे जानाः चुनाव ल्वायेगु तयारी यानाच्वँच्वं हे जसपां एमालेलिसे १४ सिटय् तालमेल याःगु खःसा मेगु थासय् याकःचा हे ल्वायेगु धकाः उम्मेदवारी बिउगु खः ।