ने. सं. ११४४ ञलाथ्व दशमी -

स्वनिगलय् परीक्षण अप्वयेकल, संक्रमित न्यून

येँ (नेपालभाषा टाइम्स) – स्वनिगलय् कोरोना संक्रमण जूपिनिगु ल्याः अप्वया वनेवं सरकारं लिपांगु इलय् स्वनिगलय् जक निद्वःम्हेसिया परीक्षण याःगु दु। तर परीक्षण याःपिं मध्ये सुयाकें संक्रमण खनेमदुगु खँ धाःगु दु ।

थ्वयां न्ह्यव याःगु २२०० म्हेसिया परीक्षणय् धाःसा स्वम्हेसिके संक्रमण खनेदुगु खः । थुपिं टोखा नगरपालिकाया हरियाली बस्तीयापिं खः । थुपिं मध्ये छम्ह कैलालीं वःम्ह व मेपिं निम्ह मिसा स्थानीय जूगु खँ धाःगु दु ।

स्वनिगलय् संक्रमणया ल्याः अप्वया वनेवं समुदाय स्तरय् संक्रमण न्यना वंगु दु वा मदु धकाः स्वयेगु निंतिं इपिडियोमोलोजी तथा रोग नियन्त्रण महाशाखां परीक्षण यायेगु ज्या न्ह्याकूगु खः । महाशाखां खुद्वःम्हेसिया परीक्षण यायेगु योजना दयेकातःगु दु ।

महाशाखां स्वनिगःया स्वंगुलिं जिल्लाया झिनिगू थाय् ल्ययाः परीक्षण याःगु खः । प्रत्येक थासय् १८० म्हेसिया स्वाब संकलन याःगु खः । महाशाखां अस्पतालया आकस्मिक कक्षय् भर्ना जूपिं बिरामी, ओपिडीइ वइपिं बिरामी व स्वास्थ्यकर्मीतय् नं परीक्षण याःगु दु। उकथं हे बैंक, मालपोत थेज्याःगु अप्वः भीडभाड जुइगु थासय् वइपिं सेवाग्राही तकं परीक्षण यायेगु ज्या जुयाच्वंगु खँ महाशाखां धाःगु दु। महाशाखाया कथं म्हिगः तक ४२०० म्ह व्यक्तिया स्वाब संकलन यायेधुंकूगु दु ।

महाशाखाया कथं बिहीवाः तक स्वनिगलय् संक्रमित जुपिं मुक्कं ३६५ म्ह दु। गुकी येँय् २४४म्ह, यलय् ७६म्ह व ख्वपय् ४५ म्हेसित संक्रमण जूगु दु। स्वनिगलय् संक्रमण अप्वयावनेवं सरकारं अनिवार्य रुपं माक्स तयेत, भौतिक दूरी कायम यायेत व साब्वं लखं ल्हाः सिलेत सचेत याःगु दु। आः सार्वजनिक सवारी साधन नं चले जुइगु सुरु जुयावःगुलिं थप सतर्कता नालेत स्वास्थ्य मन्त्रालयं धाःगु दु ।

थप १६७ म्हेसित कोरोना
बिहिवाः न्हिछिया दुने नेपालय् थप १६७ म्हेसिके कोरोना संक्रमण खनेदुगु दु । म्हिगः स्वास्थ्य तथा जनसंख्या मन्त्रालयय् याःगु नियमित कोरोना अपडेटया झ्वलय् थ्व जानकारी बिउगु खः । थुकिया लिसें नेपालय् कोरोना संक्रमितत ल्याः १७,३४४ म्ह थ्यंगु दु । थुपिं मध्ये ११,२४९ म्ह संक्रमितत कोरोना मुक्त जुयाः छेँय् लिहां वनेधुंकूगु खँ मन्त्रालयं धाःगु दु । म्हिगः न्हिछिया दुने जक २१३ म्ह संक्रमितत ल्वय् लंकाः छेँय् लिहां वंगु खँ धाःगु दु ।

म्हिगः संक्रमितत जूपिं मध्ये दकलय् अप्वः धनुषा २७ म्हेसिके संक्रमण खनेदुगु खः । अथेहे नवलपरासीइ पूर्वय् १७ म्ह, ओखलढुंगाय् १५ म्ह, कैलाली व कञ्चनपुरय् १४-१४ म्ह दु ।