१० गते बुंगद्यः सालीगु !

यल (नेपालभाषा टाइम्स) – बुंगद्यःया जात्रा वइगु साउन १० गते जुइगु धकाः सामाजिक सञ्जालय् चर्चा जूसां वकुन्हु जात्रा जुइ वा मजुइ धइगु अन्यौल धाःसा कायम हे दनि ।

वंगु शनिवाः ज्यापु समाज लगायत थीथी जातीय पुचः व गुथि संस्थान दथुइ जूगु बैठकं जात्राया साइत बीत जोतिष पुचःयात इनाप याःगु खः । ज्योतिष पुचलं थ्वहे वइगु साउन १० गते द्यः रथय् बिज्याकेगु व वकुन्हु हे द्यः सालेगु साइत बियागु खँ दैवज्ञ जोतिष कीर्तिमदन जोशीं ‘नेपालभाषा टाइम्स’ यात कनादिल । वय्कलं थःपिनिगु ज्या साइत बीगु जक खः धासें द्यः सालेगु ज्या १० गते याःसा बांलाः धयादीगु दु।

मेखे बुगद्यः सालेगु व्यवस्थापन याना वयाच्वंगु ज्यापु समाजया नायः चन्द्रमान महर्जनं धाःसा १० गते द्यः रथय् बिज्याइगु खँ कँसें द्यः गबले सालेगु धइगु बारे गुथि संस्थानपाखें आधिकारिक धारणा मवःगु खँ कनादिल । ‘संस्थानया आधिकारिक पौ वयेधुंकाः जक सालेगु खँ क्वःछी’ वय्कलं धयादिल । तर गुथि संस्थान यलया प्रमुख राजु भुजुयात स्वापू तये स्वयाबलय् धाःसा वय्कलं मोबाइल ल्ह्वनामदी ।

समाजया अध्यक्ष महर्जनया कथं थुगुसी द्यः सालेगु निंतिं नं सामाजिक दूरी कायम यायेगु व बाजं खलः नं म्हो जक दइगु जानकारी बियादीगु दु। वय्कःया कथं जात्रायात माक्व जक मनू दुकायेगु व जात्रा स्वःवइपिन्त दुमकायेगु योजना दयेकातःगु दु ।