व्यवस्थित व मर्यादित रुपं जात्रा संचालन यायेमाः
येँ(नेपालभाषा टाइम्स)/येँ देय्या तःजिगु नखः यँयाः न्ह्यःने थ्यंकः वयेधुंकूगु दु । सांस्कृतिक, धार्मिक व ऐतिहासिक महत्वं जाःगु यँयाः नखःया न्ह्यःने थ्यंकः वःलिसें यँयाःयात सभ्य, भव्य, व्यवस्थित व मर्यादित रुपं संचालन यायेत जात्रालिसे सम्बन्धित व सरोकारवाला थीथी गुथि, खलः, पुचलं थःथःगु हे कथंया तयारी नं न्ह्याका हयेधुंकूगु दु ।
थ्व हे झ्वलय् यँयाःया दकलय् महत्वपूर्ण व प्रमुख आकर्षणमध्ये छगू मजिपाः लाखेपाखें नं छगू सहलह ज्याझ्वः याःगु दु । लाखे आजु व्यवस्थापन समितिं यँयाःया इलय् लाखे जात्रा व्यवस्थित व मर्यादित रुपं संचालन यायेगु ल्याखं उगु ज्याझ्वः याःगु खः ।
मजिपाःस्थित लाखे आजुया थःगु हे छेँया प्रांगणय् जूगु ज्याझ्वःया उलेज्या राजनीतिज्ञलिसें नेपाली कांग्रेसया नेता, संविधानसभाया पुलांम्ह दुजः ध्यानगोविन्द रंजितं यानादीगु खः । ज्याझ्वलय् नवासें वय्कलं नेपालमन्दलय् समस्या, विघ्न वा छुंकथंया दैवी समस्या वल धाःसा कुमारि माजुया पुजा यायेगु, तलेजु भवानीलिसे सहलह यायेगु चलन दुगु खँ कनादिल । लिसें वय्कलं थुकिया दथुइ नं अज्याःगु छुं समस्या मवयेमा धकाः लाखे आजुयात सुरक्षा याःम्ह द्यःया रुपय् कायेगु यानातःगु धयादिल ।
येँ महानगरपालिका २० वडाअध्यक्ष राजेन्द्र मानन्धरं यँयाः जात्रालिसें यँयाःलिसे सम्बन्धी थीथी द्यः व मेमेगु जात्रा यायेबलय् संयमित जुयाः जात्रा संचालन यायेत इनाप यानादिल । लिसें वडाअध्यक्ष मानन्धरं यँयाः जात्रायात मर्यादित, व्यवस्थित, सुसभ्य व व संयमित जुयाः जात्रा संचालन यायेगु स्वयेमाः धयादिल ।
लाखे आजु व्यवस्थापन समितिया नायः दीपक रंजितं यँयाःया इलय् मादन पदार्थ सेवनयात निरुत्साहित यायेमाःगु खँय् बः बियादिल । नायः रंजितं जात्राय् मादक पदार्थ सेवनयात पनेमाः धासें लाखे जात्राया आकर्षणया केन्द्र विन्दु जक मखसे जीवित देवी श्रीकृमारि, श्रीगणेश व श्रीभैरवया खः सालीगु इलय् वसपोलपिंत लँ क्यनेगु व धर्म संस्कृतिया संरक्षण याइम्ह द्यःया रुपय् कयातःगु धारणा तयादिल ।
पुलांम्ह डीआईजी शारदाभक्त रंजितं थौंया इलय् लाखेया प्रचार व्यापक रुपं जुयाच्वंगु चर्चा यानादिसें गुंलां पिहां वइगु गुंला लाखे जक मखसे थीथी ज्याझ्वलय् व लिपांगु इलय् देशं पिने नं लाखे प्याखं क्यनेगु ज्यायात सकारात्मक रुपं कायेमाः धयादिल । थुकथंया ज्यां राज्यं हे मान्यता बिया वयाच्वंगु लाखे प्याखंयात अझ म्हसीकेगु व प्रचार प्रसार जुइगु व थुकिया जिम्मेवारी नं झीगु हे जूगु वय्कलं धयादिल ।
ज्याझ्वलय् इन्द्रजात्रा व्यवस्थापन समितिया नायः गौतमरत्न शाक्यं यँयाःलिसे सम्बन्धित थीथी ्र३१ गू गुथि, सरोकारवाला निकाय गुथि संस्थान, येँ महानगरपालिका पर्यटन मन्त्रालयलिसे नं समन्वय यायेगु ज्या जुयाच्वंगु जानकारी बियादीगु खः ।
उगु इलय् जनसेवा प्रहरी प्रभागया प्रहरी निरीक्षक किरण मल्लं नं सुरक्षा व सवारी व्यवस्थापनलिसें जात्राया इलय् जुइ फुगु ल्वापु, उच्छृंखल गतिविधि नियन्त्रण बारे धारणा तयादीगु खः ।
LEAVE YOUR COMMENTS